G-RV.com (Dili) : La hanesan babain ho kandidatu Prezidente 2022-2027 sira seluk ne’ebé lori dokumentu mai rezista iha Tribunál Rekursu (TR) sempre hasoru malu ho média sira ne’ebé destakadu iha TR atu halo klarifikasaun.
Maibé akontesimentu ho modelu ‘’klandestina’’ ne’ebé akontese iha loron 28/01/2022, iha óras 16:26 loraik ÓTL, karreta ho modelu mini-pajero kór matak-tuan akompaña ho karreta avanza metan tama mai ressintu TR, Kaikoli (DILI), no hiit tama Box rua ne’ebé deskonfia nakonu ho dokumentu rezistrasaun kandidatu prezidente ida nian ba fatin rezistrasaun kandidatura nian.
Liu tiha óras ida resin, ekipa ne’ebé kompostu husi ema na’in 6 resin ne’e, sai husi edifísiu TR, no halai ses husi ekipa média ne’ebé destakadu, hafoin jornalista husi média G-RTV.com halai tuir kedas hodi tenta atu halo entrevista ruma, maibé ekipa ne’e la halo komentáriu.
Nune’e, tuir fontes kredível balun ne’ebé ekipa Média destakadu iha TR assesu, hateten, ekipa ne’e ‘’deskonfia’’ mai husi kandidata Prezidente Isabél Ferreira, espoza husi atuál Primeiru Ministru Taur Matan Ruak.
Fontes ne’e esklarese liu tan, sira aprezenta ho apoiante 6000 ba TR, no rezultadu finál ba eis-Prezidente Repúblika nia espoza ne’e sei fo sai iha segunda-feira ba oin.
Entretantu, tuir informasaun ne’ebé G-RTV.com assesu, kandidatu Prezidente ne’ebé oras ne’e hahu rezistradu ona, hamutuk na’in 4 resin no balun sei iha prossesu verifikasaun nia laran.
Jornalista : Arménio.
Editór : Ekipa G-RTV.com
loading="lazy" />