LUGU la kandidata-an bá PR maibé sei apoiu líder nasionál ida

G-RTV.Com (Dili): Períodu ukun husi atuál Prezidente Repúblika (PR) Francisco Guterres Luolo sei remata iha tinan oin (2017-2022), nune’e bá tinan rohan 2021, sosiedade tomak hahu análiza no identifika kandidatu potensiál husi ema indivídu no partidu tuir konstituisaun haruka atu kandidata-an hodi hadau kadeira ema númeru ida iha Timor bá períodu  2022-2027.

Relasiona ho ida ne’e, naran sira ne’ebé mosu husi ema indivídu to’o líder TOP sira,  inklui moos diplomata senior, José Luis Guterres ne’ebé koñesidu ho naran LUGU.

Tuir nia, informasaun ne’ebé lori nia atu bá palásiu Ai-tarak laran ne’e laloos maibé sei fó apoiu tomak bá líder nasionál Xanana Gusmão.

‘’Informasaun ne’ebé dehan ha’u atu kandidata-an bá PR ne’e la loos, maibé ha’u hare ba mai, maun bo’ot Xanana iha esperénsia di’ák liu atu lidera fali nasaun ne’e,tambá  desde tempu rezistésia to’o lori ita bá sussesu, hatudu ona ita manan fronteira tasi-timór, iha konfiansa husi nasaun viziñu sira’’. Deklara Lugu liu husi telefone, Segunda ne’e.

Razaun ne’ebé Lugu aprezenta atu Xanana Gusmão re-kandidata-an mak atu hadia naksalak sira iha rai-laran no rai-liur ne’ebé durante ne’e akontese.

‘’Atualmente, ita nia nasaun iha krize barak, husi internasionál no rai-laran rasik hanesan  ekonomia no krize polítika, ita presija iha PR ida ne’ebé di’ák atu hadia naksalak sira ne’e,  nune’e hafoin tetu katak  iha ema ida ne’ebé di’ák liu ha’u mak maun bo’ot Xanana, merese bá kna’ar PR iha situasaun difísil ne’e tambá nia iha esperénsia internasionál no nasionál ne’ebé hatudu ona’’ Hateten diplomata senior ne’e.

Nia fundamenta tan, apoiu Xanana sei kria estabilidade iha rai-laran atu ajuda povu no fo dalan atu iha konfiansa fila-fali husi mundu Internasionál.

‘’ Apoiu Xanana nia re-kandidatura tambá sei kria estabilidade polítika iha rai-laran, ajuda moos hadia konstituisaun repúblika, bele fo moos esperansa bá iha povu tomak no fó dalan atu iha konfinsa fila-fali husi mundu internasionál hodi halo investimentu ne’ebé bele fo oportunidade ba kampu traballu’’. Espressa fontes ne’e.

To’o oras ne’e, tuir observasaun husi G-RTV.com, kandidatu ne’ebé favóritu tuir preferénsia husi média sosiál nian mak Xanana Gusmão, Lere-Anan Timur, Ramos-Horta, Francisco Guterres Luolo, José Luis Guterres (LUGU), Berta dos Santos, Martinho Gusmão.

Jornalista : Arménio.

Editór : Ekipa G-RTV.