G-NEWS (DILI) – Prezidente Republika, José Ramos-Horta sei hare prioridade governu nian, ba tinan 2024, liu-liu atu rezolve problema estrada sira iha baze.
‘’Estrada ligasaun mai Laclubar, iha Orsamentu Estadu 2024, ha’u lakohi Membru Governu ida mai koalia mangame ho ha’u, ha’u sei veta kedas orsamentu ne’e, bainhira la tau orsamentu ba Estrada Laclubar, maibé la’ós deít Laclubar, iha fatin balun tan hanesan iha Fatumea iha fronteira,’’ Dehan Prezidente Repúblika, José Ramos-Horta, ba populasaun sira iha Postu Administrativu Lalubar, Munisipiu Manatutu iha Sexta-Feira ne’e.
Xefe Estadu mos promete atu tau-matan ba problema be mos, eskola no saúde, tanba programa balun kompeténsia husi governu no balun bele mai husi Prezidénsia Repúblika ho orsamentu husi doador sira.
‘’Rai ne’e potensiál loos, bele kuda ai-fuan oin-oin, uluk ha’u mai iha ne’e sempre sosa abokate no bele aumenta kuidadu Kakatua, tambá iha tempu Portugues dadér-dadér ita sempre rona sira nia lian, agora la iha ona. Ha’u koalia ona ho governu Austrália oinsa bele mai husik Kakatua rihun ba rihun iha Timor-Leste,’’ informa Xefe Estadu.
Ba Xefe Estadu, Laclubar bele sai mos zona turístika ne’ebé atrativu, tanba ne’e presija hare didiak dezenvolvimentu turízmu nian no kuidadu balada fuik sira.
Oportunidade ne’e mos, Xefe Estadu infoma ba populasaun sira hotu kona-ba akontesimentu Eklipese totál ne’ebé sei akontese iha loron 21 fulan Abríl tinan ne’e no husu ‘’Inan-aman sira labele pániku, sei akontese loron nakukun la hanesan babain iha óras meiudia.
Tanba ne’e, turísta lubuk ida sei mai Timor-Leste, inklui sietísta sira hodi bele hatene reázem husi balada sira iha rai-maran no tasi-laran no ema tambá fenómena ne’e akontese iha tinan 300 dala-ida.
Molok remata atividade vizita ne’e, Prezidente Repúblika Horta, fahe mos nessesidade bázika hanesan fos no mina te’in, ba ema ho difisiénsia, inklui família vulnerável atus resin.
Fernando Malohi husi Suku Orlalan sente kontente ho apoiu husi Xefe Estadu, “Lori naran benefisiáriu nian, hato’o obrigadu ba Prezidénsia Repúblika, ami simu ida ne’e, ami kontente tebes, bele ajuda ami ba fulan balun balun nia hahan”.
Além nessesidade bázika, Premiadu Nóbel ba Páz , fahe mos pasta atus ida resin ba estudante Ensinu Bázika iha Laclubar-Villa.
Entretantu, vizita ne’e Prezidente Repúblika mos lori bainaka internasionál husi organizasaun internasionál Asia Region and Humanitaria Programme (BRAC) atu hare Laclubar no planu saida mak sira bele investe iha Postu Administrativu ida ne’e.
Jornalista: Ekipa G-News
Editór Textu: Amito Qonusere Araújo
loading="lazy" />