G-NEWS (REDASAUN) – Timor-oan tomak iha rai laran, sei selebra loron Matebian (Loron Finadu) iha loron 02 fulan Novembru kada tinan. Loron ida ne’e nu’udar loron importante ba timor-oan hotu, tanba ida-idak sei ba hamutuk ho família atu hamutuk hodi presta óemnagem ba matebian sira. Atividade barak ne’ebé kada uma kain sei hala’o; katak família balun sei han hamutuk ho matebian, liuhosi ritual ka kultural, balun seluk fali, hein loron to’o mak ba selebra misa agradesimentu hodi hetan bensaun ba ai-funan sira, hafóin ba kari iha rate ida-idak ka maiória iha santa Cruz.
Ema hotu-hotu ne’ebé hela dook, konserteza sei fila hotu ba knua, balun iha suku ba villa to’o sidade nasaun nian, balun fali mós hosi sidade ba villa, to’o fali iha suku ida-idak nian, hodi haksolok hamutuk ho família.
Nune’e sira ne’ebé hala’o viajen, tenke lao atensaun, lao ho kuidadu, tamba loron matebian (loron finadu), matebian sira sei haklalak, sei hala’o movimentu ba mai, matebian sira mós sei hala’o justisa ba ema moris.
Tanba ne’e, Mídia G-NEWS (Gattot News) husu ba sidadaun tomak, iha rai ulun to’o rai iku, tasi feto to’o tasi mane, ne’ebé hala’o viajen ba munisípiu ka suku ka aldeia ida-idak atu selebra loron finadu hamutuk ho família, viajen ho atensaun, nune’e ba ho kondisaun diak, atu haksolok hamutuk ho família, to’o fila fali mai ho kondisaun diak.
Asidente barak iha loron hirak ikus ne’e, tanba pesoal sira ne’ebé konduz transporte, la atensaun, halai ho velosidade maka’as, ikus mai provoka asidente, hodi rejulta tenke lakon vída, hodi fó tristeza ba família ne’ebé hein hela ita hotu nia prezensa ho hamnasa, haksolok, maibé rona fali novidades triste, ho mataween tanba simu ho mate isin oan sira, bei-oan, maun-alin, primu-prima, amigu-amiga no seluk tan.
Keta haluha, orasaun nafatin, atu Maromak perdua hotu ita nia sala, nune’e Nai bele uza nia kbiit tomak hodi akompaña ita hotu nia viazen ho susesu.
Redasaun G-NEWS hato’o ksolok boot bai ita hotu ne’ebé selebra loron Finadu hamutuk ho família tomak ho kontente, nune’e matebian sira tulun ita ida-idak, fó rasa no bensaun bai ta, atu ho saúde diak hodi hala’o servisu, atu dezenvolve rai ne’ebé ita sama ne’e.
G-NEWS hato’o sentidu kondôlensia ba Joven Timor-oan tomak ne’ebé hetan asidente trafiku iha loron hirak ikus rejulta lakon vída. Husu família sira atu forsa nafatin hasoru realidade ne’e.
Obrigado Waín ba atensaun
Redasaun G-NEWS
loading="lazy" />