G-NEWS (DILI) – Liuhosi komunikadu imprensa, Movementu Kontra Okupasaun Tasi Timor (MKOTT) hakarak fo ben-vimdo ba Povu Timor Leste nia belun boot Bernard Collaery mak ohin loron 18 fulan Maio 2023 hakat mai Timor-Leste.
“Ita nian belun boot Bernard Collaery hetan konvite husi Presidente Republika Dr. Jóse Ramos Horta atu hodi simu kondekorasaun iha loron aban 19 de Maio 2023, Iha Palacio da Presidencial”, haktuir iha komunikadu.
Istorikamente Povu Timor nia belun boot Bernard Collaery hetan akuzasaun iha Loron 11 Maio 2018. Akuzasaun ne’e hatun husi Attorney-General. Christian Porter ne’ebé foti desizaun hodi halo prosekusaun hasoru Witness K ho Bernard Collaery. Bernard Collaery hetán akuzasaun ho razaun defende Witness K mak uluk servisu hanesan intelejente mak hola parte iha Australian Service Intelligent Operation (ASIO) iha Dili, iha tinan 2004.
Witness K hateten, governu Australia iha tinan 2004 monta aparelu atu hodi kapta (penyadapan) konversasaun iha palacio do governu. Wainhira belun Witness K koalian sai ba publiko, Nia hetan akuzasaun husi Atorney General, tanba ne’e ita nian belun bot Bernard Collaery nudar advogadu halo defeze hodi proteze belun Witness K. Iha momentu halo defeza, ita nian belun nain rua hotu hetan akuzasaun husi Atorney-General iha tinan 2018.
Bainhira sira na’in rua hetan akuzasaun, hahú hosi tinan 2018 to’o 2019, MKOTT iha momentu ne’ebá halo asaun liuhosi demonstrasaun, hakerek karta protesta, no abaixo asinadu hodi entrega ba eis Primeiro Ministro Australia Scott Morrison. Iha tinan 2022, akontese mudansa governasaun iha Australia, ne’ebé muda husi governu koligasaun ba Governu mak lidera husi partidu trabalista.
Akontese mós mudansa ba iha Atorney-general hosi Christian Porter ba Mark Dreyfus. Iha loron 7 de Julu 2022, Atorney-General Mark Dreyfus dada fali akuzasaun hasoru Bernard Collaery desde loron ne’ebá ita nian belun bót hetan fali ninian direitu Liberdade. Maibé infelismente liberdade ne’e la akontese ba belun Witness K tanba ita nian belun ne’e rekuñese katak Nia simu desizaun tribunal nian.
“Istória badak iha letén, ohin Movemento Kontra Okusaun Tasi Timor Hamutuk ho povu tomak hakarak hato’o bem-vindo ba ita nian belun bót Bernard Collaery. MKOTT liu husi karta komunidaku ida ne’e hakarak hato’o ba publiku katak ita hotu nian luta durante ne’e hodi ezizi liberdade ba belun Bernard Collaery ohin agora sai ona realidade”, haktuir iha komunikadu.
MKOTT mós apresia ba inisiativu husi ita nian Presidente da Republika Dr. Jose Ramos Horta mak konvida ona ita nian belun Bernard Collaery hodi mai simu medalha kondekorasaun.
Iha loron hirak tuir mai MKOTT mós sei konvida parte hotu ne’ebé mak uluk fo apoiu ba Bernard Collaery atu mai partisipa sorumutu ida ho Bernard Collaery iha Aihanik-hun, edifisiu Asosiasaun Hak, Farol.
“Mesmu kee ita nian belun bót Bernard hetan ona liberdade, MKOTT nian luta seidauk remata, tanba ita nian belun Witness K seidauk hetan liberdade. Tanba ne’e MKOTT sei kontinua ezizi ba Atorney General Mark Dreyfus atu hodi dada akuzasaun hasoru belun Witness K. MKOTT mós hakarak apela ba komunidade Australiano hotu atu Hamutuk ho MKOTT husu liberdade ba belun Witness K”, hakotu iha komunikadu.
Jornalista : Ekipa G-News
Editór Testu : Amito Qonusere Araújo
loading="lazy" />