MTK deklara, Kinta ne’e Rô Berlin-Ramelau sei to’o iha Timor

G-RTV.com (Dili) :  Bainhira iha debate Orsamentu Jerál  Estadu (OJE) 2022  iha loron 3 fulan ida ne’e, membru Parlamentu Nasionál (PN) husi bankada opzisaun kestiona konabá prossesu viázem  Rô  Berlin-Ramelau ne’ebé guvernu construe iha Xina, Mai Timor Leste.

‘’Rô Nakroma para iha tasi-laran kuaze tinan 2, Guvernu tau osan atu sosa rô foun , husu Primeiru Ministru atu esplika konabá bainhira mak rô foun Berlin-Ramelau atu mai? ’’ Mahusuk husi deputada  Oecusse-Oan, Lucia Taeki iha ambiente diskusaun OJE 2022, foin lalais ne’e.

Hatan konabá preokupasaun membru PN  husi banka CNRT ne’e, Primeiru Ministru Taur Matan Ruak, disponibilija kedas Ministru Transporte no Telekomunikasaun (MTK), José Agustinho da Silva hodi hatan bá kestaun husi deputada Lucia.

‘’ Téknikamente konstrusaun Ro-Ahi Berlin-Ramelau kompleta ona %100 no hetan ona aprovasaun téknika husi Instituisaun Klasifikasaun Europeia nian iha Alemaña, fulan novembru 2021, nune’e, rô-ahi ne’e arranka husi Xina iha loron 24 novembru 2021’’ tenik Ministru José Agustinho.

MTK deklara tan, viázem rô Berlin-Ramelau, bainhira la iha impedimentu ruma, sei to’o iha Timor Leste iha semana ne’e.

‘’Bainhira la iha impedimentu ruma husi viázem ne’e, rô Berlin-Ramelau sei to’o iha Timor, iha loron 09 Dezembru 2021, semana ida tan no agora dadaun rô refere iha ona entre Tasi nasaun Taiwan no Filipina’’. deklara Ministru ne’e, iha sala plenaria ho espressaun konfiável no esperansa.

Antes ne’e, Guvernu liu husi MTK fo sai katak, hafoin rô Berlin-Ramelau hala’o teste dahuluk bá tasi laran iha fulan Maiu 2021, iha fulan Outubru 2021 nia laran possibilidade sei to’o iha Timor Leste.

Projetu konstrusaun ró Berlin-Ramelau hala’o iha Xina, liu husi akordu entre guvernu Timor Leste, assina ho Guvernu federál Alemaña no Kompañia estaleiru navál ‘’DAMEN’’ iha fulan Maiu tinan 2019.

Osan bá kontrusaun, finansia husi Guvernu Timor Leste no Guvernu Alemaña ne’ebé fahe bá rua : Alemaña ajuda ho montante € 7,8 no Timor Leste aprova € 7,1.

Ró refere ho medida largura 16, kaladu 3.3 metru, komprimentu metro 67,3, áltura metru 4,8, velosidade maxima Nós 10 to’o 12.

Berlin-Ramelau, tuir planu, sei hala’o operasaun viázem, Dili, RAEOA, Atauro, Baucau, Lautém, Viqueque.

Jornalista : Arménio

Editór : Ekipa G-RTV.