G-NEWS (DILI) — Adventu maka períodu ida ba preparasaun espirituál ba sarani sira, hahú semana haat molok selebrasaun Natál nian. Iha lian Latin, Adventus katak “to’o/mai”, refere ba Kristu nia mai iha mundu. Maski períodu ida-ne’e orijinalmente komprende hanesan hein ba Kristu nia mai daruak, iha sékulu sira nia foku sai boot atu prepara sarani sira nia fuan atu simu Ninia moris iha Belém. Adventu la’ós de’it sura loron ba Natál, maibé mós konvida sarani sira atu reflete kona-ba signifikadu Kristu nia moris no prepara sira-nia fuan atu simu Nia nu’udar Maksoin.
Teolojikamente, Adventu kontein elementu importante hein no esperansa nian. Iha Testamentu Tuan, povu Israel hein Mesias ne’ebé sei liberta sira, no iha kontestu ida-ne’e, Adventu fó hanoin ba sarani sira atu moris iha esperansa ne’ebé metin, katak Maromak nia promesa sira sei sai loos. Hein ne’e, la’ós hein de’it, maibé mós preparasaun espirituál ida ne’ebé enkoraja ema atu arrepende, hafoun sira-nia kompromisu ba fiar, no simu Kristu ho fuan ne’ebé prontu. Perspetiva teolójika Adventista nian hatudu katak Kristu nia mai nu’udar manifestasaun loloos Maromak nia domin nian no Ninia mai daruak sei lori salvasaun perfeita ba ema hotu.
Iha liturjia Adventu nian, tema balu maka levanta atu ilustra espirituál semana ida-idak nian. Semana dahuluk foka ba “Esperansa”, ne’ebé fó hanoin ba sarani sira kona-ba sira-nia esperansa iha Kristu ne’ebé mai atu lori salvasaun. Semana daruak iha tema “Dame*, ne’ebé deskreve promesa Kristu nian nu’udar Ida ne’ebé Lori Dame. Semana datoluk koñesidu ho tema Ksolok, ne’ebé reprezenta ksolok kona-ba Mesias nia mai. Iha semana haat, introduz tema Domin, ne’ebé fó hanoin mai ita katak Maromak mak hun ba domin ne’ebé perfeitu no rohan-laek.
Simbolizmu iha Adventu maka’as, no elementu ida-idak iha signifikadu teolójiku ne’ebé kle’an. Símbolu ida ne’ebé familiar liu maka lilin haat ne’ebé sunu kada semana Adventu nian. Lilin dahuluk, ida kór-roxu, simboliza esperansa no hein. Lilin daruak mós kór-roxu, neʼebé simboliza dame neʼebé Kristu sei lori. Lilin datoluk, kór-roza, signifika ksolok ne’ebé mosu hosi hein ne’ebé besik atu remata. Lilin dahaat kór-roxa fali, simboliza Maromak nia domin ne’ebé akompaña Ninia povu. Lilin ida-idak la’ós de’it símbolu fíziku, maibé mós bolun ida atu moris tuir valór sira ne’ebé Kristu hanorin.
Kalendáriu Adventu nian, ne’ebé dalabarak uza iha igreja no uma sira, maka dalan seluk atu selebra époka hein nian ida-ne’e. Loron-loron, odamatan ki’ik ida iha kalendáriu loke, hodi hatudu imajen ida, versíkulu Bíblia nian, ka orasaun badak ida ne’ebé lori kongregasaun atu hanoin kona-ba Kristu nia mai. Prátika ida-ne’e tulun sarani sira atu konsentra nafatin iha sira nia preparasaun espirituál sira iha fulan Dezembru tomak, hodi medita kona-ba esperansa moris Kristu nian ne’ebé sei lori naroman ba mundu nakukun ida.
Maibé, liu fali de’it preparasaun sira ba selebrasaun sira Natál nian, Adventu maka tempu ida ba introspesaun no arrependementu. Iha moris loron-loron nian, sarani sira hetan konvite atu hakbesik ba Maromak liuhusi orasaun, jejún no hahalok domin nian. Adventu fó hanoin mai ita katak Kristu mai la’ós de’it nu’udar kosok-oan iha balada han fatin, maibé mós nu’udar Maromak ne’ebé hakarak ukun iha ita-nia moris. Ida-ne’e maka tempu ida atu reflete kona-ba signifikadu husi Ninia moris, ne’ebé lori salvasaun ba umanidade, no atu avalia oinsá ita bele enkarna esperansa, dame, ksolok, no domin iha ita-nia moris rasik.
Adventu maka tempu ida ne’ebé nakonu ho esperansa, preparasaun, no reflesaun. Períodu ida-ne’e konvida ita atu haree kle’an liután kona-ba signifikadu Kristu nia mai iha istória umana no iha ita-nia moris. Liuhusi hein ida-ne’e, ita hetan hanoin katak Ninia mai dahuluk lori salvasaun ba mundu, no Ninia mai daruak sei lori restaurasaun no dame perfeitu. Iha orasaun no selebrasaun ida-idak, Adventu konvida ita atu moris iha esperansa konstante, hodi hein Kristu nia mai ho fuan nakonu ho ksolok no prontidaun.
Lilin Adventu: Símbolu Esperansa ne’ebé nabilan
Tradisaun prinsipál ida iha selebrasaun Adventu nian maka sunu lilin haat ne’ebé tau iha koroa Adventu. Lilin ida-idak reprezenta tema espesífiku ida, hahú ho lilin dahuluk simboliza esperansa, tuir fali ho lilin dame, ksolok, no ikus liu lilin domin iha semana dahaat. Iha kalan Natál, sunu lilin dalimak, hanaran “Lilin Kristu”, hodi selebra Jezús nia moris nu’udar naroman mundu nian.
Tempu ida atu reflete no fahe domin
Adventu la’ós de’it kona-ba hein Natál. Tempu ne’e mós nakonu ho atividade espirituál oioin, hanesan orasaun, reflesaun pesoál, no serbisu igreja nian. Igreja barak hala’o serbisu espesiál Adventu nian, iha-ne’ebé ema sira hetan konvite atu reflete no hafoun sira nia kompromisu fiar nian. Aleinde ida-ne’e, família barak mós kria tradisaun rasik, hanesan loke kalendáriu Adventu nian, ne’ebé kontein mensajen espirituál no surpreza ki’ik loroloron.
“Adventu konvida ita atu apresia no simu Natal la’ós de’it hodi prepara fizikamente, maibé mós hodi prepara ita-nia fuan,” Ida-ne’e maka tempu ida atu haburas esperansa, hametin fiar, no fahe domin ho ema seluk.”
Espíritu Adventu iha Dezafiu nia leet
Iha moris ho dezafiu oioin, tempu Adventu fó oportunidade ba sarani sira atu esperiénsia fali dame no ksolok ne’ebé mai hosi Kristu nia moris. “Adventu fó hanoin mai ita katak maski mundu ne’e nakonu ho difikuldade maibé iha esperansa boot liu ne’ebé mai husi Maromak”,
Família barak mós uza tempu Adventu nian hodi foka ba hahalok laran-di’ak nian, hanesan tulun sira ne’ebé presiza ka fahe bensaun sira ho sira ne’ebé ladún iha sorte. Espíritu fahe no domin ba ema seluk enrikese signifikadu loloos Natál nian.
Ho selebrasaun Natal ne’ebé besik ona, tempu Adventu hanesan lembransa ida kona-ba signifikadu Kristu nia mai ne’ebé lori naroman no esperansa foun ba ema. Espera katak, liu husi tempu Adventu ida ne’e, sarani sira bele simu Natal ho fuan ne’ebé nakonu ho dame, domin no ksolok.
loading="lazy" />