G-NEWS (DILI) – Hafoin Governu apoiu orsamentu miliaun 2 pontu 5 dollares amerikanu ba Organizasaun Arte Marsiais no Organizasaun Federativu hamutuk 17, iha ne’ebé OAM tolu (IKS, PSHT, KORK) mak hetan fundu boot liu hamutuk $300 ital mil, ne’ebé realiza liuhosi serimónia lansamentu iha GMT, Dili, Kinta-feira (13042023).
Kinta-Feira (13042023) ba G-News, Diretór Ezekutivu IKS PTL Kera Sakti Timor Leste Samuel Guterres promete sei utiliza fundus ne’e ho diak.
“Ami sei utiliza fundus ne’e ho didiak hodi dezenvolve organizasaun IKS PTL sai organizasaun ida ne’ebé profesional ho karakter desportu tuir kondisaun, no situasaun ita nia rai Timor Leste, no ho fundu ne’e sei ajuda tebes ami hodi hadia diak liu ami nia Administrasaun, Jestaun, Rekursu nomos dezenvolve no kontrola diak liutan ami nia membru, hodi nune’e promove no prátika diak liu organizasaun arte marsial IKS PTL ho profesionál”, hateten Samuel.
Organizasaun IKS PTL Kera Sakti Timor Leste, sei uza fundus ne’e tuir planu espesífiku ne’ebé trasa ona.
“Ami nia proposta detailhu ami submete ona iha KRAM no iha proposta nee ami foka ba planu espesifiku 5”, Diretór Ezekutivu OAM Kera Sakti ne’e esplika liutan.
Programa sira ne’ebé OAM IKS PTL Kera Sakti Timor Leste sei hala’o ho fundus ne’ebé apoiu hosi Governu.
1. Funsionamentu ba Sekretariadu IKS PTL
Atu Sekretariadu Organizasaun IKS.PTL funsiona ho efetivu hodi serbii vizaun no objetivu organizasaun nian no implementa planu mak organizasaun iha ona.
2. Resensiamentu Membru
Iha sistema baze dadus ida-idak bele ona resensia ami nia membru hotu-hotu de dadus ida no uza ona baze de dadus ne’e hodi fornese servisus mak membru sira presija.
3. Konstrusaun Sede IKS-PTL
Organizasaun IKS PTL Kera Sakti Timor Leste iha ona fatin ka rai privadu iha área Masilidu, Tasitolu ne’ebé organizasaun IKS PTL hola iha tinan 7 liu ba, no ho fundus ne’ebé Governu oferese ami, sei uza hodi hala’o konstrusaun sede IKS.PTL ida diak, nune’e bele hala’o funsaun organizasaun nian, hodi koordena no komunika planu atividade sira hotu.
4. Kompetisaun Nasionál ba Organizasaun
Ho fundus ne’e mos, OAM IKS PTL Kera Sakti Timor Leste sei implementa ho eventu kompetisaun nasionál ida iha kada tinan, no hare orsamentu ne’e adekuadu loos hodi suporta aktividade kompetisaun.
5. Formasaum ba Treinadores IKS-PTL
Ami sei fo formasaun ba treinador sira, iha formasaun ne’e, OAM IKS PTL Kera Sakti Timor Leste hatama mós matéria sira hanesan edukasaun Sivika, espiritualidade, nasionalimu no patriotismolu, nomos valores kultural sira, depois hetan ona formasaun ToT kona ba oinsa halo planu hanorin, hanorin no avaliasaun ba membru sira.
Jornalista : Ekipa G-News
Editór Testu : Amito Qonusere Araújo
loading="lazy" />