Jornalísta : Amar Belo //
G-RTV.com (Dili): Relasiona ho eleisaun prezidensiál segunda volta, Prezidente Partidu Demokrátika (PD), Mariano Assanami Sabino husu ba inan-aman sira atu hakmatek hodi ba vota no labele fiar rumoris sira iha média sosiál.
Tuir Nia, Partidu Demokrátiku iha nia pozisaun atu hato’o ba públiku, labele fiar rumoris ne’ebé mosu.
“Husu ba Inan-aman sira hotu atu nafatin hakmatek no fo vontade ho seriedade atu ba sentru votasaun tanba ita nia votus mak determina ita nia futuru no mudansa ba rai ida ne’e, tamba ne’e mak rumoris ne’ebé mosu dehan, iha kilat ilegal no ameansa sira, ne’e inimigu ba demokrasia, nu’udar PD iha responsabilidade atu hato’o katak, lala’ók sira ne’ebé ameansa sosa povu nia votus, intimida oi-oin, ne’e lalaok sira ne’ebé anti demokratiku, ita nia rai proklama nu’udar Repúblika Demokrátika Timor Leste, ita hotu iha responsabilidade atu kontribui atu prossesu demokratizasaun bele la’o di’ak iha ita nia rai,” Deklara Assanami ba jornalista sira iha Sala Konferénsia, Sede Nasionál, Kolmera, Dili, Segundu-Feira Ohin, 18/04/2022.
Eis-kandidatu iha volta da-uluk ne’e, husu ba komunidade liu-liu jóvem sira atu bele fila ba ida-idak nia fatin hodi kontribui bá páz, estabilidade no iha responsabilidade atu ba Vota.
“Husu ba Jóven sira hotu, atu fila ba ida- idak nia fatin hodi kontribui bá páz no estabilidade inklui iha responsabilidade ba vota tanba vota ne’e futuru ita nian ba prossesu konstrusaun estadu ba oin “ Tenik Nia
Entretantu, iha eleisaun prezidensiál segunda volta ne’ebé sei hala’o iha loron 19/04 agora, PD deside ona atu fó nia apoiu tomak ba kandidatu ho númeru sorteiu 1, José Ramos-Horta hodi kompete ho kandidatu númeru sorteiu 2, Francisco Guterres Lú Olo.
(REMATA).
loading="lazy" />