G-RTV.com (DILI) : Partidu Demokrátika Repúblika De Timor (PDRT), apela ba fiskais PDRT tomak iha terristóriu nasionál atu hala’o servisu ba resensiamentu Eleitorál hodi kolabora ho Sekretáriadu Tékniku Administrasaun Eleitorál (STAE) atu konvense eleitór foun.
‘’Hafoin lansamentu nasionál ba resensiamentu eleitorál no baze ba dadus, komesa ohin ba oin hala’o imi nia servisu atu kolabora ho STAE hodi konsensualiza, konsola, no konvense eleitór foun sira ne’ebé atinje ona idade 17, atu hakbesik ba fatin resensiamentu Eleitorál ne’ebé iha’’, haktuir Sekretáriu Jerál (Sekje) PDRT, Eng. Matias Borromeu, iha konferénsia Imprensa ne’ebé hala’o iha Tasi-tolu, Kinta ne’e.
Iha konferénsia ne’e, Porta-voz Borromeu reforsa tan, husi Estrutura nasionál to’o baze, militante no simpatizante PDRT nian atu konsola nafatin eleitór foun sira hodi hamutuk ho PDRT ba sussesu iha festa demokrasia.
‘’Ba estrutura nasionál to’o baze, kuadrus polítiku, militante no simpatizante sira atu konvense no konsola eleitór foun sira atu ba rezistu no haforsa liu tán PDRT hodi hasoru festa demokrasia ne’ebé sei mai, no bele lori Partidu ne’e ba vitória’’. Esklaresse Borromeu.
Nia moos salienta liu tan katak, situasaun pademia Covid-19, husu Militante no simpatizante PDRT nian atu kumpri regra protokolu ba prevensaun nian, nune’e bele hases Timor Leste husi virus ho nia variente sira.
Sekje deklara moos, PDRT husi nasionál, rejionál no baze, preparadu atu tuir festa demokrasia ne’ebé sei akontese iha tinan 2022 no 2023 tambá PDRT uluk no agora la hanesan, PDRT agora jerasaun tuan entrega bá jerasaun foun.
Jornalista : Arménio.
loading="lazy" />