G-RTV.com (DILI) : Partido Libertação Popular (PLP) nu’udár partidu da-III ne’ebé hetan votu barak iha eleisaun parlamentár 2017.
Hafoin Prezidente Repúblika (PR) Franscisco Guterres Lu-Olo dekreta eleisaun ba Prezidente Repúblika 2022-2027, ne’ebé sei akontese iha 19/03/2022, PLP deklara la taka dalan atu apoiu kandidatu ida.
‘’Ami la taka dalan bainhira iha komunikasaun ruma husi partidu polítiku ka kandidatu independente ruma atu apoiu, ita sei deside hamutuk liu husi konferénsia partidu nian’’. Deklara Prezidente Interinu PLP, Abrão J. Freitas via-telefone ba G-RTV.com foin lalais ne’e.
Partidu ne’ebé lidera husi atuál Primeiru Ministru Taur Matan Ruak, aprezenta razaun la iha kandidatura tamba sei konsentra liu ba eleisaun parlamentar tinan oin.
Hatan konabá informasaun ne’ebé espalla iha públiku katak PLP sei fo opsaun rua : orienta militante partidu atu vota ho konsiénsia ou apoiu kandidatu Lu-Olo, Prezidente Interinu ne’e rezeita informasaun ne’e.
‘’Konabá informasaun sira ne’e, konforme ema ida-idak nia espetativa, maibé opsaun sira ne’e sei depende ba desijaun kolektiva liu husi kongressu partidu, atu foti pozisaun ruma’’. Haktuir Prezidente interinu ne’e.
Entretantu, tuir informasaun ne’ebé espalla ona iha públiku, provizoriamente, kandidatu Prezidente Repúblika períodu 2022-2027 mak hanesan :
- Franscisco Guterres Lu-Olo.
- Armanda Berta Dos Santos.
- Mariano Assanami Sabino.
- Adriano do Nascimento.
- Virgilio Guterres ‘’ Lakuma’’.
- Milena Pires.
- José Ramos-Horta.
- Lere Anan Timur.
- Martinho Gusmão.
- Antero Bendito.
Atualmente, kandidatu ne’ebé deklarante uluk liu ona mak Franscisco Guterres Lu-OLo ne’ebé hetan ona apoiu husi partidu Fretilin.
Jornalista : Arménio.
Editór : ekipa G-RTV.com
loading="lazy" />