G-NEWS (DILI) – Parlamentu Nasionál liu-husi karta ofísiu nú 426/2023/V/PPN ne’ebé asina husi Prezidente Parlamentu Nasionál, Aniceto Longuinhos Guterres Lopes iha Kuarta-Feira (5/04/2023) hakotu knaar Komisariu Comissão Anti-Corrupção (CAC) ba mandatu datoluk.
Tuir komunikadu ne’ebé G-News asesu iha Kinta-Feira (06042023) haktuir, desizaun Parlamentu Nasionál ne’e hodi anula desizaun anteriór liu-husi karta nú ofisiu 457/2023/V/PPN, 20 janeiru 2023, ne’ebé hanaruk mandatu Komisariu CAC nian atu kontinua hala’o misaun CAC nian hodi hein eleisaun ba Komisariu foun.
Maibé, iha prosesu eleisaun komisariu foun seidauk konklui, no iha tempu hanesan, iha duvida lubuk ida husi públiku no parte sira nakait kona-ba lejitimidade Komisariu Mandatu datoluk nian, ho nune’e, PN deside hodi termina knaar Komisariu CAC ba mandatu datoluk iha loron 5 fulan Abril tinan 2023.
Ho nune’e, hahu husi loron 6 Abril 2023, CAC sei la iha ninia lideransa no atividade importante CAC nian hanesan prevensaun no investigasaun kriminál ba krime korrupsaun paradu. CAC so bele funsiona fali normál bainhira hetan ona Komisariu foun.
Terseira Mandatu Komisariu CAC Sergio Hornai eleitu husi PN iha loron 15 Janeiru 2019, ho votus 42 husi deputadu sira 5a lejislatura no simu posse husi PPN Arão Noe, iha loron 21 Janeiru 2021, iha Uma Fukun PN. Durante hala’o mandatu, nomeia Komisariu Adjuntu na’in 3 mak; Augosto Castro no Alexandre Freitas husi Espesialista Anti-Korrupsaun CAC nian, no Luis de Oliveira Sampaio husi sosiedade sivil hodi tulun nia hala’o misaun CAC nian tuir lei haruka.
Antes ne’e, Deputadu sira iha Parlamentu Nasionál tau ona ajenda iha plenária atu halo eleisaun, maibé bankada opozisaun la marka prezensa, no plenária la priense korum, nune’e eleisaun ba Komisáriu CAC la realiza, ikus mai Prezidente Parlamentu Nasionál Aniceto Guterres hakotu knaar Komisariu Comissão Anti-Corrupção (CAC) ba mandatu datoluk.
Jornalista : Ekipa G-News
Editór Testu : Amito Qonusere Araújo
loading="lazy" />