G-NEWS (DILI) – Polisia Nasional Timor Leste (PNTL) prepara ona hodi asegura periódu kampanha Eleisaun Parlamentar (Elpar), ne’ebé sei realiza iha fulan Maiu, maibé Komandu PNTLL seo preokupa kona-ba rekursu humanu.
Komandante Jerál PNTL Komisáriu Faustino da Costa, ba G-News, Kinta-Feira (09032023), iha Salaun CFP Academia Comoro Dili hateten, ho mudansa sentru votasaun, sei afeta ba kolokasaun membru Polísia sira, maibé prepara ona, maske iha preokupasaun.
Alende preokupa kona-ba Rekursu Umanu ne’ebé limitadu, Komandu-Jerá PNTL mós preokupa klima, kondisaun estrada, hanesan estrada kotu, dalan nakfera no ponte balun monu.
“Ita nia transporte sira atu asesu ba ne’e, parte Komandu nia kompetensia haree saida maka ita iha ona, para atu apoiu liu-liu ba ekipamentus seguransa ruma ka ou meius sira seluk, apoiu membru sira hodi hala’o servisu liu-liu hahú hosi kampanha to’o Eleisaun”, dehan Komisáriu ne’e.
Komandu Polísia Munisípiu sira mós aprezenta preokupasaun kona-ba identifikasaun fatin ne’ebé sai risku ba konflitus.
“Maibé ita labele foti akontesimentu ida rua ne’ebé iha, para depois ida ne’e ita uza fila fali hanesan métodu ida ba fatin risku iha tempu kampanha, ita bele dehan katak kampanha ne’e bele to’o fulan ida ou fulan ida liu”, Komisáriu Faustino haktuir.
Entertantu, Komandu Jerá PNTL orienta ona Komandante Polísia Munisipiu sira, atu fó ordem ba membru sira hodi prepara saúde no mentalidade diak, to’o loron eleisaun. Alende ne’e, Komandu mós orienta membru sira kontinua hala’o patrullamentu, lao ain no kareta, tama sai suku, halo aproximasaun nomos sosializa ba komunidade sira, kona-ba seguransa durante periódu kampanha eleitóral, loron eleisaun, kontajen de votus, to’o formasaun Governu.
Jornalista : Ekipa G-News
Editór Testu : Amito Qonusere Araújo
loading="lazy" />