PR Horta Promete Sei Kria Fundu Ba Kafé

Jornalísta : Armenio //

G-RTV.com (Ermera) : Prezidente Repúblika (PR), José Ramos-Horta, Sábadu ne’e hala’o diálogu komunitáriu ho populasaun munisípiu Ermera.

Iha diálogu ne’e Horta afirma sei kria fundu kafé ida tuir promessa kampaña iha eleisaun prezidensiál 2022 nian atu aumenta produsaun, Proteje folin kafé inklui produtór Kafé.

‘’Iha mundu halo ona fundu petrolífera, agora ne’e iha mos fundu kafé atu halo investimentu ba aumenta produsaun kafé, proteje mós folin kafé, tambá folin kafé hanesan folin produtu sira seluk iha mundu, inklui proteje produtór kafé,’’  Dehan PR Horta iha diálogu komunitáriu ho povu Ermera ne’ebé hala’o iha are edifísiu terras no proprietáriu, munisípiu Ermera (Gleno), ohin, 09/07/2022.

Nia reforsa tan, servisu detalladu husi kriasaun fundu kafé ne’e sei mai husi estratejia guvernu mak hare oinsa atu intervém hodi sai protessaun ba produtór sira.

‘’Detallamente fundu kafé ne’e ho estratezia guvernu nian mak sei hare oinsa fundu kafé ne’e intervém hodi proteje mós produtór, atu nune’e labele iha tinan-tinan osan iha liman laran (produtór) tun no sa’e, dalaruma tun liu tan, inpaktu ba povu nia moris, nune’e oinsa fundu kafé ne’e sai protessaun ba produtór kafé sira,’’ Deklarasaun husi PR.

Premiadu Nóbel bá Páz ne’e halo mós apelu ida, ‘’ha’u halo apelu ba Timor-oan tomak, la’ós de’it iha reziaun kafé katak ita hadomi kafé nu’udár kultura nasionál no identidade nasionál, ‘’ Apelu Horta.

Nune’e, durante diálogu iha sesaun husu no hatan, reprezentante komunidade sira preokupa liu mak folin kafé maibé PR kontinua fó razaun katak folin kafé la permanente iha merkadu tamba depende ba produtór no konsumidór kafé iha mundu hanesan kontinente Amérika, Ázia inklui Europa nune’e Horta hala’o polítika kriasaun fundu bá produtór kafé hodi proteje folin kafé.

Horta mós konsidera kafé la’ós de’it produtu ne’ebé ema konsumu maibé sai mós hanesan sai mos fatin turízmu nasionál hodi atriai turísta rai-laran no rai-liur.

Diálogu komunitáriu ho PR ne’e hetan akompañamentu husi lideransa no membru orgaun 3, hanesan Parlamentu Nasionál, Guvernu, Tribunál inklui mos autoriedade máximu seguransa no defeza, diplomata, líder partidu polítiku, autoriedade munisipál Ermera, Populasaun, estudante no hetan seguransa máximu husi PNTL Ermera.

(REMATA).