G-NEWS (DILI) – Komandu Polísia Trânzitu Munisípiu Dili, aviza ona ba kompaña sira ne’ebé iha kontentor atu labele halo movimentu iha tempu loron, tanba Ministériu Transporte Komunikasaun no Ministériu Interior fó ona karta konjunta ba kompaña sira, no halo ona sensibilizsaun iha fulan rua ba kotuk.
Kinta-Feira ne’e (16/11/2022), Polísia Trânzitu Munisípiu Dili halo konferensia Imprensa iha edifísiu Komandu Polisia Kaikoli Dili, atu aviza ba kontentor sira, hodi labele halo sirkulasaun iha tempu loron, tanba sei implementa despaixu konjunta entre Ministériu relevante sira.
Komandante Polísia Trânzitu Dili Inspetór Domingos Gama hateten, Polísia Trânzitu sei halo operasaun ka chek poin ba kareta pezada sira liu-liu kontentor sira ne’ebé sei hahú, iha Segunda semana oin (21/11/2022) tuir despaixu Ministériu Transporte Komunikasaun no Ministériu Interior.
“hakarak atu avizu ba públiku katak ita nia kompaña sira ne’ebé iha kontentor, Segunda semana oin sei la halo sirkulasaun iha tempu loron, no orienta ita bo’ot sira nia kondutor tuir sirkulasaun oráriu renovasaun ne’e, Ida ne’e mak atu fó sai ba públiku katak liu-liu ba sira ne’ebé mak estabelese iha kapital Dili, iha Segunda-Feira semana oin ita sei la tolera sirkulasaun kontentor sira ne’ebé halo movimnetu iha tempu loron hahu husi tuku 7 dader to’o tuku 7 kalan, bainhira tama ona tuku 7 dader implementa ona, sé kontentor sira mak halai iha tuku 7 dader ba oin to’o iha tuku 7 kalan ne’e viola regras no viola despasu konjuntu ne’ebé estabelese ona”. Dehan Nia.
Tanba ne’e sei implementa sansaun ba kontentor sira tuir artigu 10 kodigo estrada nian, kontentor sira ne’ebé mak viola karta konjunto ne’e sei kona multa ka sansaun ho osan u$ 75 dolár, se karik osan 75 dolar ne’e sira konsidera kiik liu hodi kompaña sira nafatin atu viola maka ami sei avansa iha artigo 57 lei kodigo estrada nian ne’ebé selu minimo liu mak u$ 600.00 dolár mas ami sei la aplika koimas ida minimo ne’e, ami tenke avansa ho maximo u$ 3000.00 dolár.
Kompaña sira tenke iha inisiativa atu fó hatene ba kondutores kontentor sira atu labele halo sirkulasaun iha tempu loron, karik balun ne’ebé urjente bele ba iha Komando Polísia Munisípiu Dili atu halo deklarasaun ka konkordansia ruma atu bele autoriza tuir nesesidades ne’ebé iha atu nune’e komandu bele fó seguransa ba atividade refere no Komando Polísia promete sei garante seguransa 24 oras ba kontentor sira ne’ebe halo sirkulasaun iha tempu kalan
Polísia Munisípiu Dili husu mós ba kondutor kontentor sira atu halo kooperasaun ho Polísia, sé karik iha pessoal ruma mak ho intensaun at atu halo asaun krimi hasoru membru Polísia Trânzitu ruma maka Polísia sei la tolera no identifika kriminozu sira atu buka tuir hodi kaptura ba entrega tuir prosesu Investigasaun Kriminal.
Jornalista : Teotónio Alves Pinto
Editór Textu : Amito Qonusere Araújo
loading="lazy" />