G-NEWS (DILI) – Relasiona ho deskontente ne’ebé akontese hafoin Ministériu Edukasaun Juventude no Desportu (MEJD) anúnsia ofisialmente vaga professor voluntáriu ne’ebé admite atu asina termu kontratu, hamutuk na’in 1.715.
Hosi rezultadu hirak ne’e, akontese deskontente hosi professor Voluntáriu sira, iha ne’ebé ejiji Governu atu tau matan ba problema hirak ne’e.
Edukador sira informa ba mídia sira katak, polítika Ministériu ne’e atu halimar ho distinu edukador sira nian, no estraga mós prosesu aprendijajen iha eskola.
“Ami balun tinan barak ona dedika ami nia an hodi hanorin estudante sira, maibé polítika Governu ne’e atu estraga fali ami nia dedikasaun sira ne’ebé ami halo durante ne’e”, tenik Mestre sira ho lian makas, iha Jardim Colmera (Kuarta-Feira 15022023).
Mestre balun mós lamenta ho Ministériu Edukasaun ninia planu no polítika ne’ebé sempre halo promesa barak, no ho sistema birokrásia, makaas maske mestre sira hato’o bebeik ona sira nia ejijensia.
“Ami sira ne’e hato’o bebeik ejijensia, maibé la iha solusaun, no ami konsidera polítika Ministériu Edukasaun ne’e hanesan labarik sira halimar rai-rahun. Lakleur ita rona Diretór koalia ida, lakleur rona fali buat seluk, ita rona fali iha Mídia Ministru koalia buat seluk tan, ne’e ita atu fiar loos ida ne’ebé”. Tenik mestre sira.
Ho problema ne’e, professor sira ne’ebé sai vítima, husu ba Ministru Edukasaun Juventude no Desportu, Komisaun D ne’ebé trata assuntu ba Edukasaun atu tau matan ba preokupasaun hirak ne’ebé sira hato’o ona.
Hatan ba problema sira ne’e, Ministru Edukasaun Juventude no Desportu Armindo Maia husu ba professor sira ne’ebé nia naran seidauk sai iha lista kontratu nian, bele hato’o reklamasaun.
Aliende ne’e, iha tenpu badak, mestre sira ne’ebé nia naran tama ona lista, sei aprezenta ba Konsellu Ministru hodi halo aprovasaun, hafoin submete ba Prezidente da Repúblika hodi halo promulgasaun.
Jornalista: Ekipa G-News
Editór Textu: Amito Qonusere Araújo
loading="lazy" />