G-RTV.com (DILI) : Preokupa ho atividade illegal ne’ebé buras iha fronteira terrestre, Premiadu Nóbel bá Paz no Líder Nasionál José Ramos-Horta enkoráza Ministériu Interior (MI) no PNTL ne’ebé hala’o nia kana’ar bá prevensaun Covid-19 nian iha fronteira terrestre.
‘’Papél MI importante bá prevensaun Covid-19, nune’e ha’u mai atu fó apoiu moral bá vise-MI liu-liu bá PNTL ne’ebé hala’o servisu bá desijaun estadu nian hodi kontrola ema tama sai illegal iha fronteira, tambá Covid-19 nia variante delta mai fasil liu husi fronteira terrestre’’. Tenik líder nasionál Ramos-Horta iha MI, bainhira remata enkontru ho Vise-MI António Armindo iha MI, Tersa ne’e.
Nia moos apoiu tebes forsa PNTL no F-FDTL ne’ebé hala’o kna’ar iha fronteira terrestre ho Indonézia no Eis-prezidente ne’e agradese moos bá autoriedade seguransa Indonézia ne’ebé konsege deteta no prende Timor-oan ne’ebé viola lei imigrasaun.
‘’Bainhira estadu ida la konsege kontrola nia fronteira, ne’e inpaktu bo’ot, tambá ne’e mak apoiu %100 bá asaun ne’ebé ita nia forsa PNTL no FDTL hala’o iha fronteira, agradese moos bá autoriedade TNI indonézia ne’ebé deteta no prende Timor-oan viola lei imigrasaun’’. Dehan Diplomata senior ne’e.
Tuir informasaun ne’ebé G-RTV assesu, durante fulan rua ikus ne’e (Jullu-Agustu), autoriedade seguransa Timor no Inodonézia iha fronteira terrestre iha Maliana no Suai, deteta no deporta sidadaun Timor-oan kuaze 500 resin ne’ebé viola lei imigrasaun nian hodi hakat ilegalmente fronteira terrestre bá zona Covid-19 ho nia variante Delta.
Rekorda moos, atividade illegal ne’ebé akontese maioria mai husi grupu arte marsiais ne’ebé atu ultrapassa no fila-fali mai territóriu Timor ho objetivu sae sintu artemarsiais nian iha provínsia NTT-Kupang (Indonézia).
Jornalista : Arménio.
Editór ; Ekipa G-RTV.
loading="lazy" />