G-RTV.com (Dili) : Iha loron 16 fulan ida ne’e, komisaun Anti Korrupsaun (CAC-sigla português) ezekuta madadu buska iha domisíluiu no prende sasan husi Tribunál Distritál Dili ho númeru NUC 0007/21.CAC TL bá Autoriedade Portuáriu Timor Leste, Institutu Públiku (APORTIL, IP) relasiona ho kazu aluga rô Tranship II.
Ba dala uluk, CAC hala’o buska kuaze óras rua resin ne’ebé hahu iha tuku 9 dader iha diresaun nasionál Cabotagem-APORTIL,IP hodi prende dokumentu no ekipamentu hanesan laptop no lori diretór nasionál Cabotagem ho inisiál ‘’FdCC’’ ba edifísiu CAC hodi hala’o investigasaun klean.
Hafoin remata iha diresaun nasionál Cabotagem, ekipa investigadór CAC kontinua kedas missaun ne’ebé hanesan ba edifísiu sentrál APORTIL,IP iha portu Dili, hodi buska dokumentu sira ne’ebé ligasaun ho prossesu administrasaun aluga Rô Transship II.
Iha edifísiu sentrál, simu direta husi prezidente APORTIL,IP, Flavio Neves no hala’o kolaborasaun diak ho ekipa investigadór CAC atu bele kontinua halo buska.
Bainhira ekipa investigadór CAC husu konabá prossesu administrasaun ne’ebé aprova hodi aluga Rô refere husi Indonézia, prezidente APORTIL ho kalma, hatan katak kontratu no pagamentu direitamente mai husi aprovasaun Ministru Transporte no Komunikasaun (MTK), José Agustinho da Silva.
‘’Kontratu Ministru mak aprova direitamente inklui prossesu pagamentu maske pagamentu refere seidauk la’o, ami hala’o de’it servisu tuir irarkia’’. tenik prezidente APORTIL,IP.
Hatan konabá kestaun ne’e, bá G-RTV.com, Ministru Transporte no Komunikasaun , José Agustinho da Silva konsidera asaun husi CAC nian hanesan sinál di’ák atu hatene hodi klareza polémika ne’ebé iha.
‘’Ne’e sinál di’ák, atu hatene hodi klareza polémika ne’ebé iha, sira (CAC) hala’o sira nia kna’ar nune’e prossesu la’o atu iha serteja informasaun hodi identifika buat loos no sala’’. Hateten José Agustinho hafoin partisipa iha komemorasaun loron FALINTIL ba dala 46 iha kuartel Jenerál, Fatuhada Dili, Sexta ne’e.
Atuál sekretáriu jerál husi partidu KHUNTO ne’e fo hanoin moos katak, APORTIL,IP hanesan ajénsia autónomu ne’ebé iha atonomia administrasaun no finanseiru.
Entertantu, Rô Transiip II aluga husi guvernu Timor Leste iha fulan Maiu liu bá atu substitui Rô Berlin Nakroma no Sucses ne’ebé tuir planu sei halo manutensaun.
Substituisaun provizóriu ne’e, Rô tranship II sei hala’o persaun Dili bá RAEOA inklui Atauro maibé Rô refere sai polémika bainhira labele atraka iha portu Dili, Atauro bainhira tula Primeiru Ministru Taur matan Ruak no konselheiru máximu partidu KHUNTO José Dos Santos, ho ida ne’e lori CAC hala’o intervensaun hodi investiga iha loron 10 fulan Juñu, no deskobre katak iha prossesu administrasaun aprovezionamentu konabá aluga Rô refere, konsidera fatal tebes.
Oras ne’e dadaun Rô tranship II la halo operasaun iha kedas fulan balun liu ba tambá guvernu deside hodi hapara kontratu no operasaun, ikus mai sira tenke fila-fali ba rai orízem.
Jornalista : Arménio.
Editor : Ekipa G-RTV.com
loading="lazy" />