Primeira Volta : Lú Olo Hato’o Agradesimentu No Deskulpa, Prontu Bá II Volta

Jornalísta : Arménio //

G-RTV.com (Dili) : Kandidatu Prezidente (KaPREZ), Francisco Guterres Lú Olo ne’ebé okupa iha segundu lugár votu-ás liu iha eleisaun prezidensiál (ElPR) 2022, agradese bá eleitór sira.

‘’Ha’u sente ónradu tebes no agradese eleitór ida-idak ne’ebé fó fiar nafatin ba ha’u atu sai dala ida tan Prezidente Repúblika’’, afirma Francisco Guterres Lú Olo liu husi komunidade ne’ebé fó sai husi ekipa sussesu, Fernando Gusmão, iha sede nasionál ekipa sussesu, Lecidere (Dili), 24/03/2022.

Kandidatu ne’ebé hetan votu 143408 (%22,16), okupa II lugar, agradese mós partidu FRETILIN ne’ebé apoiu tomak nia kandidatura.

‘’Ha’u agradese bá apoiu tomak ho inkondisonalmente husi partidu FRETILIN ne’ebé mobiliza ninia rekursu umanu no lojístika hodi apoia ha’u nia kampaña’’, Dehan atuál Prezidente Repúblika (PR)  atuál ne’e.

Eis-Prezidente Parlamentu Nasionál, husu mós deskulpa bá públiku karik iha apoiante ruma ne’ebé ofende iha tempu kampaña.

‘’Nu’udár kandidatu PR, ha’u husu deskulpa karik ha’u ka ha’u nia apoiante ruma ofende ema ruma iha kampaña hala’o husi loron 2 to’o 16 Marsu 2022’’, Hatutan Lú Olo.

Nia mós apresia ba povu tomak ne’ebé ezerse nia direitu ho hakmatek, demokrátiku no órdem iha loron votasaun hodi hatudu katak povu hakarak moris iha ambiente páz.

Saúda mós kandidatu hotu-hotu ne’ebé esforsu-án atu kampaña eleitorál la’o iha ambiente hamkamatek iha loron votasaun.

Iha biban ne’e, ekipa sussesu ne’ebé lidera husi José Manuel Nakfila, hatudu mós prontidaun atu kompete dala-ida tan iha segunda volta ne’ebé iha possibilidade bo’ot atu akontese. (REMATA).