Promove Páz No Valoriza Direitu Umanu, CNC Realiza Formasaun Ba Jornalísta

Jornalísta : Rosa Carvalho //

G-RTV.com (Ainaru) : Centro Nacional Chega!I.P (CNC) liu husi koooperasaun ho Concelho Imprensa Timor Leste (CI), organiza formasaun jornalízmu ba jornalista sira hodi promove liu tan páz no direitu umanu ihaTimor Leste

Iha formasaun loron rua ne’e, Diretór ezekutivu CNC, Hugo Maria Fernandes, esplika katak CNC no CI halo kooperasaun hodi implementa relatóriu CHEGA! Hodi valoriza kna’ar jornalísta nian hodi promove páz.

‘’CNC ho CI iha kooperasaun ida atu implementa relatóriu CHEGA!, ne’ebé hateten atu valoriza kna’ar jornalísta tambá partisipasaun jornalízmu nian ne’ebé iha tinan 24 bainhira luta bá ukun-rasik-án sai entidade ne’ebé fó nia kontribuisaun singnifikante, nune’e liu husi formasaun ne’e bele haklean kapasidade iha promossaun direitu umanu no promove páz’’ Dehan Hugo Maria Fernandes iha abertura formasaun ne’ebé hala’o iha salaun parokiáll, Postu-Administrativu Maubisse (Ainaro), Kuarta ne’e, 30/03/2022.

Hugo mós esplika liu tan, programa formasaun ne’e hala’o ona desde halo kooperasaun entre CNC no CI iha tinan 2020 hodi koontinua oferese formasaun kapasitasaun ba jornalísta sira.

Iha fatin hanesan, partisipante Angêlica hato’o agradesimentu ba CNC ne’ebé realize ona formasaun ne’e.

‘’Agradese tebes CNC ne’ebé realiza atividade ida ne’e, hau primeira-véz partisipa nune’e bele hasa’e liutan kapasidade jornalizmu atu promove páz no direitu umanu’’, espressa agradesimentu husi jestora rádiu komunidade Lian Manu Koku Atauro.

Partisipa iha atividade ne’e reprezentante jornalísta hamutuk nain 35 ne’ebé mai husi jestór rádiu komunidade, média Imprime no Online (Rádiu, Telvizaun, Média online) iha Timor Laran tomak no formadór mai husi professional CI durante loron rua, 30-31/03/2022.

(REMATA).