G-NEWS (DILI) – Estrutura Nasionál Organizasaun Persaudaraan Setia Hati Terate (PSHT) bolu atensaun ba membru tomak iha territóriu Nasionál atu kontribui Paz no hakmatek iha sosiedade nia leet, durante prosesu kampanha, eleisaun, apuramentu to’o formasaun Governu.
Prezidente PSHT Baltazar Lemos Seixas, ba G-News Kinta-Feira (13042023) hateten, estrutura PSHT iha seksaun disiplinar, sei tau matan ba membru sira ne’ebé kontra regras seguransa no perturba ordem públiku, nune’e haburas paz ba Dezenvolvimentu Nasionál.
“Ami fó sai ona katak, durante kampanha ka tama eleisaun, ema se deit labele halo barullu, ita mak seguransa ba ita nia nasaun, ba ita nia an, seguransa ba família, seguransa ba sé deit”, Baltazar esplika.
Kuandu elementu ruma halo problema ka kria konfuzaun, uza atributu Organizasaun, iha ona ekipa atu atu atende. Kuandu atende labele ona, estrutura Nasionál sei halo koordenasaun ho PNTL hodi bele responde hamutuk, tanba tuir Prezidente PSHT ne’e katak, hakarak eleisaun ne’e lao ho diak no susesu, nune’e bele dezenvolve nasaun ne’e ba oin.
“Kuandu ami identífika ne’e ami nia membru duni uza atributu, ami sei foti prosesu ba sira. Tanba primeiru ita fó Xamada atensaun, maibé kuandu nia kontinua, ita fó sansaun ba sira, sei la ativu iha Organizasaun mínimu tinan rua no másimu tinan lima”, Baltazar esplika liutan.
Prezidente PSHT ne’e sublinha tán katak, Organizasaun PSHT iha maneira atu bele responde membru sira ne’ebé halo arbiru.
Relasiona ho membru balun ne’ebé halo afiliasaun ba partidu sira, Prezidente PSHT ne’e esplika katak, ema individu iha dirietu atu hili partidu tuir nia konsiensia, maibé bandu tatál kuandu ba ho organizasaun nia naran tanba estatu organizasaun la hakerek.
Antes atu hakotu entrevista ho G-News, iha Kinta-Feira tuku 10 kalan, Prezidente PSHT fiar katak, membru tomak sei kontribui ba paz no hakmatek iha prosesu kampanha to’o eleisaun.
“Ha’u garante katak durante prosesu kampanha to’o eleisaun buat hotu lao hakmatek. Ha’u mós fó sai ona ba Ha’u nia membru sira iha Timor laran tomak katak, hotu-hotu tenke kontribui ba seguransa Paz no estabilidade, seguru ita nia an, seguru ita nia komunidade, para dezenvolve ita nia nasaun ba oin hodi hatudu Demokrásia ba mundu ho diak”.
Jornalista : Ekipa G-News
Editór Testu : Amito Qonusere Araújo
loading="lazy" />