G-NEWS (DILI) – Roo Kruzeiru MS Paul Gauguin hosi Austrália tula turista hamutuk 204 hosi Austrália, Amerika, Nova Zelandia, Inglaterra, Polónia, Kánada, Brazil no Indonézia. Hosi númeru ne’e, la inklui ho ekipa tékniku sira ne’ebé servisu iha roo refere.
Kapitaun Roo MS Paul Guaguin Michel Quioc informa, Roo tinan-25 ona tula turista ho ekipa tékniku hamutuk 331.
“Ami kontente tebes vizita mai iha ne’e, Ohin Ami mai lori turista sira vizita Timor-Leste, liu-liu iha Díli, no fatin seluk tan hodi hare fatin istóriku sira, merkadu tradisionál no atu koñese Timor nia emar sira,” Kapitaun Roo hateten.
Roo tula turista to’o iha Porto Díli oras 07h00 to’o 18h00, durante loron ida iha Timor-Leste, depois kontinua sira nia vizita ba Papua Nova Guine.
“Sira mai hanesan turista sira gosta halo paseu, hodi haree rasik Timor-Leste nia fatin ne’ebé mak interesadus ba turista sira. Ita bolu pakote tolu mak hanesan ita bolu Dili Historical Tour iha átividade rua, sei vizita ba Maubara, antiga prizaun Aipelo no vizita kafe Railaco, alende ne’e vizita mós uma lisan iha dalan ba Railaco. Ami nia esperiensia maiória turista sira ho idade avansadu mak vizita tanba sira iha osan uitoan, mas iha joven ida rua deit,” Diretór Ajénsia Ponte Timor Tour&travel, Platão Lebre, informa.
Kooperasaun ne’e hala’o entre Ajénsia, Kamara Komérsiu Indústria Timor-Leste (CCI-TL) no Ministériu Turizmu, Komérsiu no Indústria.
Durante iha Timor-Leste, turista sira ne’e sei vizita fatin sira hanesan Centru Nasionál Chega, Arkivu Muzeu Rezisténsia Timorense, Tais Market Colmera, Cristo Rei, Vizita kafe Railaco-Ermera no Maubara-liquiça. Antes ne’e Roo Kruzeiru MS Paul Guaguin tula uluk turista sira mai Timor-Leste.
Fatin seluk ne’ebé mak poténsia tebes ba turizmu labele seidauk bele vizita tanba kondisaun Estrada, no tempu limitadu.
Diretóra Turizmu afirma, objetivu turista sira vizita Timor-Leste hanesan parte ida diverte ba sira nia moris, tanba sira nia nasaun ne’ebé dezemnvolvidu ona, nune’e sira hakarak vizita Timor-Leste hodi haree rasik Timor-Leste nia orijen ne’ebé mak seidauk dezenvolve.
Benefísiu ba Timor-Leste mak nu’udar promosaun Timor-Leste ba railiur no benefisia ba negosiante sira ne’ebé mak faan produtu hanesan kafé no artezenatu.
Jornalista : Ekipa G-News
Editór Textu : Amito Qonusere Araújo
loading="lazy" />