G-RTV News (24/05/2021): Liu husi publikasaun vídeo iha rede sosiá iha loron 23/05, konabá agresaun fízika ne’ebé halo husi Seguransa Polísia Nasionál Timor Leste (PNTL) hasoru vítima ho inisiál Octávio Thal nu’udár vendedór ambulante iha postu fronteira Tasi-Tolu.
Tuir védeo ne’ebé publika iha média sosiál, PNTL hala’o diskusaun ho vendedór ne’e, no rezulta vendedór so’e nia nu’u no hetan baku husi membru PNTL iha fatin akontesimentu.
Sasin balun iha fatin akontesimentu haktuir, vendedór ne’e la simu razaun husi PNTL no hala’o diskusaun, ikus mai hamosu baku husi membru PNTL ba Vítima.
‘’Ha’u hamriik do’ok, hodi hateke, vítima halo duni diskusaun ho PNTL tamba de’it loron ne’e la’os tempu merkadu, ikus mai vítima ho nervozu so’e tun nia nu’u, maibé la’ós baku ka tuda membru PNTL’’. Haktuir sasin nu’udár moos vendedór ida iha area akontesimentu (24/05).
Iha fatin hanesan fen husi vítima espressa ho laran triste konabá kazu husi nia la’en nian.
‘’Ha’u triste loos, hare akontesimentu ne’e tamba moris mak ho de’it fa’an nu’u no motor tiga-roda ne’ebé ami uja, tamba kridit nune’e fulan-fulan tenke selu $200 to’o $250 Dollár ba na’in husi motorizada tiga-roda ne’e’’. espressa Dália da Costa iha nia rezidénsia, Aldeia 12 de Outubro, Suku Komoro, Munisípiu Dili.
Dália reforsa tan, kanek ne’ebé nia laen hetan mak tuku iha nia tilun, kotuk no grave liu mak iha nia hirus matan, rezulta kalan ida la bele han.
Entertantu, tuir deklarasaun husi PNTL ne’ebé publika iha pájina offisiál PNTL fo sai kronolojia, iha loron 23/05 óras 11:00 dadér membru PNTL ne’ebé destakadu iha postu Seguransa fronteira Tasi-Tolu dehan ba negosiante katak loron ohin la’ós transakasaun sasan, loron merkadu ka transaksaun sasan mak iha Segunda, Kuarta no Sexta-Feira ho razaun tamba Serka Sanitária no Konfinamentu domisiliáriu.
Publikasaun ne’e konfirma moos, agresaun fíziku ne’ebé PNTL halo bá vítima ne’e tamba Octavio Thal mak tuda uluk nu’u bá membru PNTL.
Hafoin publikasaun husi pájina offisiál PNTL, hetan kedas krítika husi netizén iha média sosiál katak preokupa no dúvida ho professionalízmu PNTL atu hala’o servisu iha terrenu liu-liu iha iha tempu difísil ida ne’e.
Bazeia bá dekretu guvernu 12/2021 8 Marsu, konfesa, bá negosiante ambulánte no merkadu loke hanesan babain maibé nafatin halo tuir regra ba prevensaun Covid-19 ne’ebé Ministériu Saúde no Organizasaun Mundiál Saúde fó sai.
To’o notísia ne’e publika, seidauk iha konfirmasaun verbál husi parte PNTL.
Jornalista : Julio Paixão/Dominggos Moreira.
Editór : Arménio.
loading="lazy" />