Jornalísta : Arménio //
G-RTV.com (Dili) : Lideránsa másimu Partidu FRETILIN, Partidu Demokrátiku (PD) no Partidu Libertasaun Populár (PLP) iha Postu Administrativu Atabae, Munisipiu Bobonaro deklara ofisilamente hodi afilia ba partidu Congresu Nacional Recontrução Timorense (CNRT) ne’ebé lidera husi Kay Rala Xanana Gusmão.
‘’Deklarasaun afiliasaun ne’e hala’o aberta hosi Vise-Koordenadór Partidu FRETILIN, Postu Atabae, Alberto Fontes, Koordenadór Partidu Demokrátiku (PD), Sergio Malibuti no Koordenadór Partidu Libertasaun Populár (PLP), Atabae, Carlos Vereficação ho membru sira, ne’ebé, asiste direita hosi Premiadu Nobel da Paz, Jose Ramos Horta no estrutura partidu CNRT iha Postu Administrativu Atabae Vila-Bobonaro’’, sita husi Komunikadu Imprensa ne’ebé G-RTV.com assesu iha domingo ne’e (20/02/22).
Hafoin deklara afirmasaun pozisaun polítika hodi afilia ba CNRT, lideransa partidu politíku na’in tolu simu ho esturura CNRT nasionál hodi tara tais no entrega atributu partidu CNRT hanesan Bandeira no kamizola nu’udar simbolu agradesimentu.
Vise-Koordenadór FRETILIN Atabae, Alberto Fontes deklara, hamutuk ho estrutura partidu FRETILIN balun hakarak hamutuk ho partidu CNRT, tanba hatene katak, Xanana no Horta maka bele hadia problema iha nasaun ne’e.
“Agradese ba partidu CNRT hodi simu ami nia afiliasaun ba loron ohin ho estrutura kuadrus no aldeia ho, ha’u agradese ba FRETILIN rona ha’u afilia mai CNRT ho kompañeiru barak hodi lori ha’u ba hasoru lideransa CPN balun, no ha’u mai hamarik ho partidu CNRT hodi lori forsa politika, hodi apoia Maun Boot Xanana hodi apoia maun boot atu ukun, so maun boot Xanana maka bele kaer ukun hodi hasai povu husi mukit,” dehan Alberto iha komunikadu ne’e.
Nia dehan, nia parte kolabora servisu hamutuk ho estrutura partidu CNRT no grupu movimentu hotu- hotu hodi tama sai uma komunidade atu halo sosializasaun ba povu atu vota ba kandidatura prezidente republika, José Ramos Horta no númeru sorteiu 14.
Iha fatin hanesan, Koordenadór Partidu Demokratiku (PD), Sergio Malibuti deklara, nia parte deside ho konsiénsia hodi afilia ba CNRT atu hamutuk fali ho Xanana no Ramos Horta ne’e mak iha kapasidade atu kaer ukun.
“Ha’u husu ba estrutura postu Atabae, mai ita hamutuk hodi ita la’o, bele lori nasaun ne’e ba oin. Ha’u agradese ba Dr. Jose Rmaos Horta, hau mai hosi partidu PD ho ha’u nia laran atu hamutuk ho maun bo’ot Kay Rala Xanana Gusmão atu lori nasaun ne’e ba oin. Se la’ós maun boot Xanana, se tan mak atu lori nasaun ne’e ba oin. Agradese mós ba maun boot Dr. Jose Ramos Horta katak, ami mai ho forsa tomak hodi apoia ita boot ba presidente, tanba ne’e ha’u mai lori ema barak sei vota ba ita boot iha loron 19 Marsu agora,” nia afirma.
Tuir Koordenadór Partidu Libertasaun Populár (PLP), Atabae, Carlos Vereficação hato’o Agradese, tanba CNRT bele simu fali sira ho militante balun hodi apoia CNRT kaer ukun atuhadia hikas nasaun ne’e iha setór hotu- hotu.
Nia dehan, dadaun ne’e sira nia parte konvense ona miltante partidu partidu PLP hodi muda pozisaun apoia Xanana no Ramos Horta ne’ebé sei vota iha loron eleisaun 19 de Marsu 2022.
“Ami tomak ohin deklara fila mai ho CNRT, no ami sei afirma ami nia pozisaun iha loron votasaun 19 de Marsu 2022 agora hodi vota iha maun boot José Ramos Horta no sei vota mós ba maun boot Xanana iha eleisaun parlamentar,” nia hatete.
Entretantu, Premiadu Nobel da Paz, Jose Ramos Horta hato’o agradese no parabéns ba lideransa partidu FRETILI, PD no PLP ne’ebé deside hodi afilia hamutuk ho Maun bo’ot Xanana hodi apoia Horta ba prezidente republika.
“Ha’u agradese ba lideransa partidu FRETILIN, PLP no PD ne’ebé deside hodi mai hamutuk fali ho maun boot Xanana, ha’u simu fali todan ida hosi maun boot Xanana hodi re-kandidaan para bele hadia fali ita nia nasaun ne’e, no ha’u hato’o parabéns ba imi nia konfiansa,” dehan Horta.
Horta dehan, konfiansa ne’ebé nia simu nu’udar todan boot ida, maibé Horta fiar katak, ho apoiu partidu politiku CNRT lideradu Xanana no partidu seluk tan inklui grupu movimentu hotu sei lori nia hakat liu krus todan iha eleisaun ho susesu hakat ba Palasiu Prezidente Aitarak-Laran Dili.
Iha parte seluk, premiadu nobel da Paz, Ramos Horta mós apela ba juventude sira atu krida dame no unidade hodi evita violensia no krime labele akontese durante priodu kampañia presidensiál too eleisaun parlamentar. (remata)
loading="lazy" />