Segunda-Feira, MPK Sei Selebra Aniversáriu Nicolau Lobato Ho Feira Livru.

G-RTV News (20/05/2021): Movimentu Patriotízmu Konstitusionál (MPK) sei selebra tinan moris ba dala-75 erói nasionál Nicolau dos Reis Lobato.

Atividade selebrasaun ne’e sei hala’o iha loron 24 Fulan ida ne’e liu husi Feira Livru atu fo omanejem ba Lider Nicolau Lobato.

‘’MPK sei halo feira hodi selebra aniversáriu natalísiu Erói Nasionál Nicolau Lobato ba dala-75 liu husi feira livru’’. Espressa Pe. Martinho liu husi Via-telefónika Kuarta-feira ne’e (19/05).

Pe. Martinho Hanesan koordenadór jerál ba MPK reforsa tan katak feira livru ne’e sei fan barratu ba públiku, polítiku, estudante no jornalista sira.

‘’Feira livru ne’e sei fan barratu ba públiku, polítiku, jornalista no estudante sira ho folin husi Sinku Dollár to’o Déz Dollár maibé livru limitadu, ho objetivu atu fó omenájem ba Nicolau Lobatu’’. Katak sai Nai-Lulik husi Diocese Baukau ne’e.

Hatan konabá livru saida de’it, no oinsa bele assesu ba feira refere, Eskritór Livru no Dosente filosofia klarifika, livru ho nia títulu Sabemos e Devemos vençeremos no sei assesu liu husi online.

‘’Títulu ba livru ne’e mak Sabemos e Devemos Vençer, ne’e ha’u rasik hakerek ho mekanízmu atu hetan livru iha feira ne’e, liu husi online, ho de’it telefone, ami bele lori bá’’. Hatan filósofu ne’e.

MPK hamri’ik husi Eis-Seminarista, Padre sira, ho objetivu atu responde bá meja parlamentu nasionál ne’ebé naksobu iha tinan kotuk. MPK offisiálmente fó sai iha públiku iha loron 24 Fulan Maio Tinan 2020.

Ba Tinan ida, movimentu ne’e hala’o ona atividade hanesan publikasaun artigu, edukasaun sívika iha fatin oi-oin.

Entertantu, Prezidente ba Daruak RDTL, Nicolau Dos Reis Lobato, moris iha loron 24 Fulan Maio Tinan 1946 iha rai Soibada, Munisípiu Manatutu no mate iha tempu invazaun Indonézia iha loron 31 Fulan Dezembru tinan 1978 ho pozisaun ikus hanesan Prezidente no Comadante em Xefe Das Falintil.

Jornalista : Arménio.

Editór : Júlio Paixão.