G-NEWS (LETEFOHO) – Estrada postu administrativu Letefoho liga ba suco Ducurai ho kondisaun grave tebes, hodi difikulta komunidade sira lori produtu lokal atu asesu ba merkadu no sentru saúde.
Komunidade Lordes da Costa Gomes hato’o sentimentu triste kona-ba kondisaun estrada at no, rai dodok los nune’e difikulta ba sira atu asesu ba merkadu.
“ Agora ne’e rai dodok los, ita lao ba ladiak, ba merkadu mós ladiak tamba ne’e Ha’u sente triste. Moras mós ita lao deit kuandu lao ladiak mak foin ema leba deit lori ba hospital”, informa Lordez da costa Gama ba jornalista sira tersa feira nee (21-02-2023 ) iha Suco Ducurai postu administrativu Letefoho Munisipio ermera.
Xefe Aldeia Laclo Francisco Diaz Soares mós preokupa ba kondisaun estrada refere tanba durante nia mandatu difikulta tebes ba nia komunidade sira atu lori produtu lokal asesu ba merkadu, no konsulta saúde mos susar.
“Durante Ha’u nia mandatu Ha’u ukun, Ha’u nia komunidade no aldeia ida ne’e rasik no aldeia sira seluk difikulta tebes estrada husi munisípiu mai postu administrativu to’o mai suku ho kondisaun ladiak, halo Ha’u nia komunidade defisil lori produtu lokal ba asesu merkadu no saúde “ reforsa Francisco.
Tuir Nia, iha tempu udan kondisaun estrada rai dodok hodi preojudika ba ambulánsia sira mai tarde hodi lori inan isin rua sira ka ema moras ba.
“ Liga ba saúde liu-liu ba inan isin rua ka ema moras sira iha Ha’u nia aldeia Laclo defisil mós tanba ho kondisaun estrada ne’ebé prejudika ba ambulánsia sira mai atende tarde “ Haktuir nia.
Iha tempu hanesan, Xefe suku Ducurai Rafael Soares Maia mós afirma, estrada ho kondisaun grave ne’e hahú hosi fronteira Ainaro mai to’o Letefoho ho kilómetru 18 kondisaun grave. Ami mós iha meius ida atu komunidade halo voluntáriu taka, maibé labele tanba iha fatin balun fatuk atu asesu mós la hetan” Rafael konfirma.
Ho kondisaun estrada at ne’e meius ida ne’ebé mak komunidade halo mak tenke halo esforsu rasik atu nune’e bele faan sira nia produto sira.
“Meius ida mak hakarak ka lakoi sira tenki tula ho sira nia kuda rasik mak foin ba merkadu maibé ida ne’ebelé mak laiha entaun sira nia produtu dodok iha sira nia fatin ” Rafael haktuir.
Ho kondisaun estrada ne’ebé Grave halo komunidade hamutuk ho autoridade local sira hulan ema moras ka inan isin rua sira ba sentru saude bainhira ambulánsia tarde ka lamai.
Entertantu populasaun suco Ducurai iha Aldeia 13 ho nia totál populasaun hamutuk ema nain rihun neen atus rua, sanulu resin ida.
Jornalista : Asensiu
Editór Textu : Amito Qonusere Araújo
loading="lazy" />