SEPS Reintegra Komunidade Afetadu Husi Inundasaun iha Hera.

G-RTV News (23/04/2021): Sekretáriu Estadu Protesaun Sivíl (SEPS) reintegra komunidade ne’ebé afetadu inudasaun iha semana balun liu bá.

Tuir Diretór Jerál SEPS, Ismael da Costa babo, katak prezensa SEPS ho Plan Internasionál hakarak diálogu ho komunidade afetadu sira atu esplika konabá reintegrasaun ba hela fatin uluk.

‘’SEPS hamutuk ho Plan Internasionál, autoriedade lokál suku Hera, padre sira atu fasilita diálogu ho komunidade afetadu atu bele reintegra ba fali sira nia hela fatin’’. Haktuir Diretór ne’e iha fatinsentru evakuasaun konventu Kanosiana, Suku Hera, Munisípiu Dili, Sexta-Feira ohin.

Fontes ne’e, esplika mós konabá fasilita apoiu emerjénsia husi SEPS liu husi Diresaun Nasionál ba Prevensaun no Konflitu Komunitária (DNPKK)

‘’SEPS liu husi DNPKK sei fo apoiu emerjénsia hanesan hahan, sasan dapur atu nune’e sira bele fila fali ba sira nia hela fatin maié ba sira ne’ebé uma estragus totál sei akumulaiha nafatin iha fatin refuziadu, ekipa sei halo verifikasaun no sei fo  apoiu rekuperasaun ba sira atu sira bele fila ba sira nia uma ne’ebé estragus totál’’. Afirma fontes.

Konabá preokupasaun husi família afetadu nian, diretór ne’e agradese ba preokupasaun komunidade nian liui-liu normalizasaun mota, bee mós, no eskola.

‘’Agradese tebes ba imi nia preokupasaun konabá normalizasaun mota, bee mós, no eskola. Husi SEPS sei kanaliza ba liñas ministeriais sira atu konsidera preokupasaun hirak ne’e’’ espressa Ismael.

Iha Sentru evakuasaun Konventu Kanossa Hera, akumula uma-kain hamutuk 38 no ema nain 185. Husi programa reintegra ne’e família ne’ebé sei fila mak sira ne’ebé iha ona kondisaun mínimu iha hela fatin.

Durante akontesimentu inundasaun, hamosu sentru evakuasaun hamutuk 42, hafoin liu tiha semana balun, sentru evakuasaun tun ba 12 ho númeru ne’ebé ki’ik tamba iha de’it mak sira ne’ebé hela fatin estragu totál.

Jornalsita : Julio Paixão.

Editór : Arménio.