G-NEWS (MANUFAHI) – Ekipa konjunta husi servisu munisipais hamutuk ho ekipa protesaun sivíl, ne’ebé lideradu husi Administradór Munisípiu, tersa-feira (09/05) ohin, lori apoiu emerjénsia urjente ba komunidade afetadu uma ka’in 24 iha aldeia kolokau suku Umaberloik Postu Alas Munisípiu Manufahi.
Relasiona ho udan bo’ot iha area Munisípiu Manufahi, rezultadu komunidade uma ka’in 24 hetan afetadu husi korénti mota laklo, Administradór orenta kedas diretúr servisu munisipais sira, Obras Públika, saúde, Autoridade protesaun sivil, Seguransa alimentar, agrikultura, Crúz Vermelha, Polísia, lori apoiu emerjensia hodi tulun komunidade afetadu sira.
Administradór Munisípiu Manufahi Arantes Isaac Sarmento, orenta Diretór servisu munisipais sira, tun direitamente ba fatin akontesimentu hodi atende komunidade sira tuir kna’ar servisu munisipais ida idak nian, hanesan saúde, agrikultura, obras públika no seluk seluk tan .
Hafoin akonte, Administradór Munisípiu orienta ona obras públiku, atu kordena ho Institutu Jestaun Ekipamentu IP, hodi normaliza urjente mota laklo ne’ebé fó ameasa ba komunidade Kolokau nia vida.
Apoiu emerjénsia ne’ebé ekipa konjunta lori atu tulun komunidade sira, apoiu Ai-haan hanesan fos, mina, supermi, ikan-sardina, kafé, biskuit, susu been, masin-midar, Xá, bee aqua no seluk seluk tan. Apoiu seluk lona, kapoti, sanak, biti, sabaun, rinso, Gayung, basian, Kanuru, bikan no kaneka.
Ekipa konjunta ne’e mós sei tun ba terenu, kontinua halo Evakuasaun ba komunidade afetadu inklui halo identifikasaun ba komunidade iha fatin sira seluk ne’ebé hetan inundasaun ne’e.
Entertantu ekipa pesoal tun ona iha fatin akontesementu hodi fó tratamentu saúde ba komunidade afetadu sira.
Atu informa mós katak, komesa hori kalan to’o ohin, udan kontinua bo’ot iha area Munisípiu Manufahi.
Jornalista : Júlio Guterres
Editór Testu : Amito Qonusere Araújo
loading="lazy" />