Simu Taxa Kopa Mundiál, FFTL Hasoru PR Eleitu

Jornalísta : Arménio

G-RTV .com (Dili) : Prezidente Federasaun Futeból Timor Leste (FFTL) hamutuk hasoru malu ho Prezidente Repúblika (PR) eleitu períodu 2022-2027, José Ramos Horta hodi koalia konabá preparasaun simu Taxa Kopa Futeból Mundiál mai Timor Leste.

‘’Ami ohin, hala’o enkontru ho PR eleitu atu informa katak loron 11 fulan Juñu tinan ne’e Taxa mundiál Futeból husi FIFA sei to’o iha Timor Leste, nune’e atu husu kedas nia tempu hodi labele sai husi Timor ka programa seluk hodi simu vizita ne’e,’’ Dehan Prezidente FFTL, Francisco Jerónimo iha gabinete eis-titulár Horta, Faról, kuarta ne’e, 27/04/2022.

Atuál membru guvernu ne’e esplika liu tan, ‘’Tuir programa Taxa husi FIFA, kada tinan 4, sei bá uluk nasaun distinsaun sira ne’ebé indikadu nu’udár mós membru FIFA molok to’o iha nasaun uma na’in bá kopa mundiál no tuir regulamentu husi FIFA, iha direitu atu simu no kaer Taxa ne’e, mak Prezidente Repúblika bainhira vizita,’’ Esplika Jerónimo.

Planu ne’ebé mak iha husi FFTL, Taxa kopa mundiál futeból ne’e sei to’o iha Timor iha óras tuku 11:30 dadér no sei remata iha tuku 15:00 loraik ho programa hanesan bá uluk palásiu Prezidente no sei bá hatudu públiku iha est’adiun nasionál Dili.

Akompaña iha hasoru malu ne’e, atuál Sekretáriu Jerál FFTL ne’ebé enkontru ne’e rasik la’o kuaze oras 1 nia laran.

(REMATA)