G-RTV.com (BAUCAU)-Iha âmbitu komemorasaun loron nasionál Proklamasaun Independénsia Unilaterál ba dala-46 ne’ebé sei hala’o iha Munisípiu Baukau, Veteranu Munisípiu Baucau liu husi Konsellu Munisipál Kombatentes Libertasaun Nasionál –Munisípiu Baucau (CMCLN-MB, Sigla potuguês) organiza serimónia reflesaun ida hodi hanoin hikas memoria Saudozu komadante Daitula.
Inisiativa ne’e mai husi veteranu sira ho objetivu atu fo valór bá Luta komadante Saudozu David Alex ‘’Daitula’’ no konsolida Veteranu sira atu sai unidu liu tan.
‘’Objetivu prinsipál mak liu husi reflesaun dedika bá luta komadante Daitula hodi fanun fali jerasaun foun atu konsidera no hatene nia istória nune’e moos konsolida Veteranu tomak atu hanoin ida de’it bá nasaun nia diak, labele hamriik ketak-ketak, krítika malu no fahe malu’’ haktuir Veteranu Manuel da Costa Soares ‘’Alari’’, foin lalais ne’e iha munisípiu Baukau.
Fontes ne’e reforsa tan katak, La’ós de’it parte veteranu mak organiza maibe inklui moos husi Guvernu liu husi Ministériu Administrasaun Estatál (MAE) bazeia bá orientasaun husi Prezidente Repúblika, Francisco Guterres Luolo.
‘’Hafoin ekipa Veteranu Munisipiu Baukau hasoru malu ho Prezidente Repúblika (PR), nia konsidera katak serimónia reflesaun ida ne’e hanesan serimónia estadu nian, nune’e PR husu atu halo koordenasaun servisu entre MAE ho Konsellu Veteranu atu organiza tambá Saudozu Daitula hanesan ema importante iha Istória Luta ba libertasaun nasionál’’, afirma Veteranu ho kódiku ‘’ALARI’’ nu’udár moos sekretáriu Konsellu Veteranu Munisípiu Baukau.
Serimónia ne’e sei hala’o iha Suku Kaibada, Aldeia Wani-Uma, Postu-Administrativu Baucau –Villa, nu’udár fatin ne’ebé Saudozu rende hodi entrega-an bá militar Indonézia iha tinan 1997 hamutuk ho nia soldadu na’in 4.
Tuir Oráriu ne’ebé G-RTV.com Assesu esplika, serimónia refere, sei hahu iha loron sexta ne’e (26/11/2021) ho Missa no kalan reflesaun hafoin loron tuir mai (27/11) sei iha serimónia parada militar ne’ebé sei marka moos prezensa husi utuál Prezidente Repúblika, Primeiru Ministru Taur Matan Ruak no konvidadu ónra sira seluk.
Transmissaun direta bá serimónia refere sei hala’o husi GARDAMOR RÁDIU NO TELEVIZAUN liu husi Live Estreaming FB : Gardamortv Live no media públiku balun.
Jornalista : Arménio.
Editór : Ekipa G-RTV.com
loading="lazy" />