G-NEWS (DILI) – Bainhira rai nakaras, manu fuik ailaran semo lemo-lemo, ikan ih tasi duni malu, timoroan hosi rai ulun to’o rai ikun, hosi tasi feto to’o tasi mane, ida-idak hader hosi nia mehi kalan nian. Teki-teki, Aviaun bo’ot, besi asu makikit Timor nian, semo hosi rai seluk, iha kalohan okos Timor nian, rai lulik Lafaek Leten, iha foho lulik Timor nia tutun, iha tasi nia leten, Aviaun ne’e, tun iha ninia fatin, Aeroportu Internasionál Prezidente Nicolau Lobato, Comoro Dili.
Kuandu Aviaun A320 Air Timor to’o ona iha Lafaek ida ne’e, simu ho matak malirin, rega ho wee, nu’udar sinal domin, hosi Povu, hosi Éroi sira ne’ebé mate ba rai ne’e, hosi otas ki’ik to’o ferik no katuas, hosi maluk defisiensia sira. Domin hosi timor nia emar sira, halo bainaka sira ne’ebé hakat an iha Aeroprtu Internasionál Prezidente Nicolau Lobato, tenke husik mataween balun, tanba sente kontente, haksolok no hamnasa, hafalun ho triste, tanba hatudu katak, rai lafaek ne’e nia oan ida, sosa Aviaun ida, besi asu ida ne’ebé sei semo haleu mundu, ho identidade RDTL.
Ohin iha Aeroportu Dili, rai lulik Timor, Éroi sira, sai ona sasin. Maske la haree ho matan, la kaer ho liman, maibé sira marka duni prezensa, atu assisti nia oan no bei-oan ne’ebé lori transporte aéro.
Tuir Observasaun G-News, sidadaun sira ne’ebé helik án iha rede, iha estrada ninin, hare’e Aviaun Timor, tun iha aeroportu, sira haklalak, basa liman, no kontente tebes. Balun dehan, parese ne’e mehi.
“Horee, horee, aviaun Timor iha ona, parabéns ba timoroan ida ne’ebé sosa ona aviaun. Maromak tulun ita nafatin”, sidadaun sjra hakilar.
G-News halo entrevista ho sidadaun balun iha rotunda Nicolau Lobato, hanesan tuir mai ne’e.
- “Ita tenke kontente, ida ne’e istória ida ba Timor, tanba ita iha ona aviaun. Parabéns ba timoroan, maun Lorenco Ataúro. Ita espera aban bainrua timoroan ida sosa tán aviaun seluk. Parabéns dala-ida tán”. Sidadaun Bernardo.
“Ha’u kontente loos tanba iha aviaun. Hanesan povu ida, faan sasan, Ha’u kontente”, tenik sidadaun ida faan sabraka Aje.
“Dala uluk ita fó kontinênsia ba Éroi sira ne’ebé mate ba rai ne’e ho luta naruk. Ita mós fó parabéns ba Líder nasionál sira, ba governu tomak, maske iha diferénsia polítika, maibé tenke iha prinsípiu ida deit ba Dezenvolvimentu Timor Leste ne’ebé furak liu. Parabéns espesial ba timoroan, ataúro oan ne’ebé sosa ona aviaun, senhor Lourenço Ataúro. Ita husu ba Governu atu apoiu setór privadu sira atu hadia no dezenvolve an ba dezenvolvimentu Nasionál.
Alende ne’e Ha’u mós trist oituan, no halo krítika oituan ba governu, tanba sá mak to’o oras ne’e Roo Haksolok seidauk mai Timor. Ida ne’e preokupasaun boot ida. Buat ne’ebé la tama ita nia ulun mak, Governu ne’e iha poder polítika no ekonómia, maibé tanba sá mak Roo Haksolok la mai hela deit, enkuantu aviau bele mai ona ho poder finanseiru pessoal. Maib ida ne’e laos sasukat ida, importante mak jestór ba Governu ne’e mak tenke halo jestaun diak, se lae ho prezensa aviaun Timor hosi emprezáriu ida ninian, hatudu katak jestór ba roo haksolok la iha kapasidade, no vontade atu halo Dezenvolvimentu ba rai ne’e”, João Marito, Juventude Partidu Os Verdes.“Nu’udar timoroan orgullu, tanba timoroan rasik iha ona aviaun atu ajuda Povu hodi habadak viajen estranjeiru ninian. Kona-ba ita nia perguntas aviaun ho roo haksolok, ha’u hanoin Governu tenke aselera lalais rol haksolok, se lae povu la fiar, no agora dadauk ne’e ita iha tinan polítika. Labele halo povu ne’e vítima bebeik, ho razaun dehan ponte kais kiik, menutensau seidauk hotu, no seluk-seluk tán. Ita labele kari bebeik rai rahun ba povu nia matan. Agora mundu dijitalizadu, buat hotu dook bele besik, entaum roo haksolok ne’e hatudu katak, boot sira ne’e só koalia barak, benefísiu ba an rasik”, Lamberto Soares, Militante Partidu F-Mudansa, ba G-News, iha Timor-Plaza Dili.
“Ha’u fó parabéns Timoroan Lourenço, sosa aviaun, maibé labele halo tikete nia folin karun”, tenik Luis, hanesan faan motor, ba G-News.
“Agora Roo Haksolok la mai, halo ita moe deit. Nu’udar militante Fretilin, Ha’u sente triste. Ita tenke koalia rásiu, sala ne’e sala, loos ne’e loos”, haktuir João Felix, ba G-News iha Merkadu Timor-Plaza.
G-News halo vox Pop ba sidadaun sira atu fó hanoin kona-ba timoroan ida sosa aviaun, enkuantu Governu nia polítika sosa roo, maibé to’o oras ne’e roo hanaran roo Haksolok, seidauk to’o portu Dili, maske hetan ona bensaun iha Portugal.
Jornalista : Ekipa G-News
Editór Testu : Amito Qonusere Araújo
loading="lazy" />