G-News (LOSPALOS) – Loron 07 Dezembru 2022- Lider Istoriku, Kay Rala Xanana Gusmão konsidera loron 07 Dezembru 1975 ne’ebé Timor-Leste selebra nu’udar momentu importante hodi hanoin hikas prosesu Timoroan nia luta no terus hodi manan hikas vitoria independensia ne’ebé konstrui ho ema rihun nia terus no mate.
“Ba Timor laran tomak, iha tinan 47 ba kotuk, nu’udar loron ida ne’ebé hahú povu Maubere hatudu nia brani tebes, hatudu nia hakarak duni atu ukun aan, maski la prontu ho dezafiu oin-oin liu tiha tinan 24 nia laran maka ita foin hetan independensia,” dehan Xanana liu husi mensajen inseramentu Kampionatu Taxa Rotativa Avó Nana Postu Administrativu Lospalos, Munisipiu Lautem.
Komandante Em-Xefe das FALINTIL ne’e husu ba povu Timoron tomak kontinua kria dame ba malu iha fatin hotu- hotu hodi fó onra ba povu no gerileiru FALINTIL sira ne’ebé mate bele kontente akompaña Timor-Leste nia susesu ba oin.
“Ita fó ondra ba hotu-hotu ne’ebé lakon sira nia vida, nu’udar gerilleiru ida. Iha Munisipiu Lautem liu-liu iha Mehara iha Fatuk Kuak-OI maka sai ha’u nia eskola ba gerilla hodi bele aprende lori povu ida ne’e manan funu ne’e,” dehan Xanana.
Iha momentu istoriku ne’e, Lider Istoriku Kay Rala Xanana kontinua hamulak hodi husu forsa ba Na’I Maromak no forsa natureza no rai lulik Timor kontinau proteze no satan povu no nasaun hosi risku oin-oin hodi hamutuk harii nasaun ne’e.
Timor-Leste nu’udar nasaun ida ne’ebé moris iha demokrasia, liberdade no paz presiza tebes komponente hotu-hotu nia apoiu.
“Matebian sira, eroi sira tau matan nafatin baa mi hodi bele kaer metin nafatin imi nia mehi halo Timor ne’e rai di’ak ida, povu ne’e tuur hakmatek ho domin no dame,” tenik Xanana.
Nia hatutan, loron invasaun 7 Dezembru 1975 ne’ebé hahú hosi fronteira ba lorosa’e nu’udar istoria moruk ne’ebé Timoroan tomak sente no sei lahaluha atu konta nafatin iha istoria ba Timoroan sira iha futuru mai aprende no hatene istoria Timor-Leste nian.
Entretantu, iha oportunidade ne’e, Xanana akompaña hosi autoridade lokál no seguransa hala’o mós inseramentu kampionatu taxa rotativa Avó Nana iha Lautem ho tema “Unidade Nasonál, ami atu ba hotu ona, husik hela imi joven sira, respeita netik funu nain sira, prepara aan labele fahe malu no labele hamosu funu foun entre imi hotu imi” iha Kampu Demokraisa Futebol Lospalos Vila.
Jogu ne’e hahú loron 07 Novembru 2022 liubá partisipa hosi klube 32 ne’ebé antusiasmu partisipa hodi kontribui ba paz.
Editór Textu : Amito Qonusere Araújo
loading="lazy" />