G-RTV News (06/06/2021): Komunidade Tasi-Tolu ne’ebé afetadu ba inundasaun iha loron 04/04 liubá hamutuk ho Líder nasionál Kay Rala Xanana Gusmão hala’o serimónia agradesimentu.
Serimónia agradesimentu refere, dedika ba seitór privadu ou Emprezáriu nasionál no internasionál inklui pessoál voluntáriu sira ne’ebé apoiu Xanana hodi hakma’an terus ne’ebé povu iha Aldeia 20 De Setembru (Suku Komoro) Infrenta durante fulan rua inklui ho munisípiu sira seluk.
‘’Serimónia simples ne’e, ha’u lori bairro 12 iha Aldeia 12 de Outubru atu agradese ba ita bo’ot sira, tamba ha’u mesak labele halo buat ida, ho imi emprezáriu sira, no ema hotu, sai team ida atu apoiu hahan, normaliza Lagoa Tasi-Tolu atu povu fila-fali ba uma, hadia estrada no seluk tan’’. Intervensaun Xanana iha serimónia agradesimentu ne’ebé hala’o iha Kampu Tasi-tolu, Dominggo ne’e, (06/06).
Líder karrimátiku ne’e moos, hato’o ba ema hotu, liu-liu emprezáriu sira atu hatudu nafatin solidariedade ba malu hanesan Timor-oan.
‘’Povu Timor, husu nafatin ho imi nia solidariedade, tambá ita hamutuk iha momentu saida de’it,ita bele la’o ba oin’’. Mensájem husi Xanana Gusmão.
Iha fatin hanesan, reprezentante seitór privadu Sansaun Gomes ne’ebé apoiu komunidade afetadu sira, hateten ho firme katak sei apoiu Xanana Gusmão iha nia misaun umanitáriu tomak la’ós haree husi sikun polítika.
‘’Apoiu ne’ebé ami fó kanaliza liu husi Líder Nasionál Xanana, la’ós tambá ba kór polítika maibé kestaun umanidade ne’ebé Maun Bo’ot preokupa iha nia misaun umanitáriu no organiza, La’ós de’it ida ne’e, ami moos nafatin apoiu Guvernu iha kualkér situasaun’’. Sansaun haktuir.
Hatan konabá apoiu umanitáriu ba komunidade sira seluk iha territóriu nasaionál, emprezáriu ne’e afirma la’ós de’it Tasi-Tolu maibé iha fatin seluk moos.
‘’Hanesan emprtezáriu hamutuk ho kolega sira, desde dia 4 fulan rua liubá ami apoiu iha fatin-fatin inklui Tasi-Tolu ne’ebé Maun Bo’ot organiza, tamba hanesan Timor-oan iha obrigasaun morál atu apoiu maluk Timor-oan sira’’. Sansaun Afirma.
Reprezentante komunidade Manuel Cárçer ho espresaun kontente, agradese bá líder nasionál Kay Rala Xanana no Emprezáriu no grupu voluntáriu sira seluk.
‘’Ami agradese ba sussesu ne’ebé Avô Xanana halo ba ami, ba emprezáriu no grupu voluntáriu sira hanesan X-Team, ami la iha buat murak ida atu oferese ba imi, maibé ho de’it orasaun, imi hotu firsa ho saúde ne’ebé di’ák atu hala’o misaun ida ne’e’’. Espressa manuel.
Iha serimónia ne’e partispa husi komunidade no fahe moos sertifikadu apresiasaun ba Emprezáriu sira, grupu voluntáriu, média no entidade identifikada ne’ebé durante ne’e apoiu oina iha misaun normalizasaun Lagoa Tasi-Tolu.
Seitór privadu ne’ebé apoiu Xanana durante prossesu tomak ba normalizasaun bee iha lagoa Tasi-Tolu, apoiu umanitáriu no movementasaun iha area lagoa Tasi-Tolu mai husi Bombeiros no seitór privadu kuaze 20 resin.
Oras ne’e dadaun komunidade iha area lagoa Tasi-Tolu ne’ebé afeta ba inundasaun, kuaze % 95 mak fila ona ba sira nia hela fatin, no assesu ba estrada hahu normaliza 100% hafoin Eis-Bada’en konstrusaun Ótel Timor Xanana organiza ho emprezáriu sira atu tulun komunidade area afetadu.
Antes ne’e, iha loron Sábadu (05/06), komunidade iha area Lagoa Tasi-Tolu hala’o ona serimónia agradesimentu espesiál ba Kay Rala Xanan Gusmão hanesan xefe ekipa ba normalizasaun vida populasaun Iha lagoa Tasi-Tolu hamutuk ho Nobél ba Paz Ramos Hórta liu husi serimónia kulturál iha Tasi-Tolu.
Jornalista : Arménio.
loading="lazy" />