G-RTV.com(Dili): Líder Nasionál Kay Rala Xanana Gusmão hamutuk ho kompañia MONTANA DIAK, ajuda voluntáriu bá komunidade Becusse Sentru hodi normaliza hikas ponte ne’ebé hetan estragus iha inisiu fulan Janeiru 2022.
Hafoin remata konstrusaun iha semana kotuk, komunidade organiza serimónia simples ida atu agradese Eis-Prezidente Xanana Gusmão no Kompañia Montana Diak, nune’e xefe Aldeia reprezenta komunidade ‘’agradese bá tulun husi líder nasionál no kompañia Montana Diak ne’ebé disponibiliza kbi’it hodi tulun komunidade Becusse ‘’. Tenik husi Autoriedade Aldeia Becusse iha diskursu agradesimentu ne’ebé hala’o iha loron 15/11/2022.
Nune’e moos, Xanana Gusmão afirma iha serimónia refere katak ‘’ ha’u mesak la halo buat ida, maibé ho tulun husi kompañia Montana Diak, nune’e husu ita hotu reza bá emprezáriu sira hotu atu bele hala’o servisu diak hodi lolo-liman nafatin mai ita bainhira ita presija husu tulun’’. Tenik nia.
Iha fatin hanesan, molok atu dirije orasaun, Padre Domingos Maubere, nu’udár pároku Becora, husu populasaun atu hili líder ne’ebé besik liu povu, no bele tau matan.
‘’Festa demokrasia besik ona, husu povu atu hili líder ne’ebé besik povu, atu nune’e bele tau matan bá nia povu, dadér la hatene, kalan la hatene, nu’udár ezemplu hanesan sarani, ita hotu reza ba nia’’. Espressa Pároku Becora.
Entretantu, tuir observasaun iha festa agradesimentu ne’e, komunidade Bekora Sentru ho antusiázmu simu líder nasionál Xanana ho nia komitiva no hala’o konvíviu hamutuk ne’ebé nakonu ho amizade.
Jornalista : Arménio
Editór : Ekipa G-RTV.com
loading="lazy" />