Xanana Kontinua Apoiu Vítima Inundasaun, Domingos : Ami La Hare Ba Sasan Maibé Domin

Jornalísta : Arménio //

G-RTV.com ( Manatutu ) : Líder Nasionál Kay Rala Xanana Gusmão kontinua orienta nia ekipa hodi fó apoiu umanitáriu ba vítima inundasaun ne’ebé akontese iha semana ikus fulan Juñu 2022.

“Maske hala’o servisu iha rai-liur maibé avô Nana bainhira rona nia komunidade hetan afetadu inundasaun foin lalais ne’e, nia orienta kedas ami hanesan nia ekipa tun direta mai komunidade hodi hare iha Natarbora ne’ebé afeta ba suku rua, Aubeon no Sikone hodi fó korájem no hato’o sentidu soliedariedade inklui oferese netik nessesidade bázika ruma hodi fasilita iha loron ida-rua maibé ho domin ne’ebé ás husi Maun Bo’ot Xanana, “ Dehan Jacinto Rigoberto nu’udár reprezentante Líder Nasionál Kay Rala Xanana Gusmão iha assaun soliedariedade iha Postu Administrativu Natarbora ( Manatutu), suku Aubeon, Kinta-Feira ne’e, 07/07/2022.

Jacinto reforsa tan, apoiu umanitáriu ne’ebé iha fó ho Domin maske labele responde hotu no apoiu hirak ne’e mak hanesan Supremi, mina ba halo modo, no fós.

Iha fatin hanesan, Xefe Suku Aubeon ne’ebé lori naran família vítima husi suku Aobeon no Sikone hato’o obrigadu no agradese wain ba Eis-Primeiru Ministru Xanana nia Domin.

” Lori komunidade nia naran hato’o obrigadu no agradese ba Maun Bo’ot Xanana no ekipa maske do’ok maibé Avô ( Xanana) rona ami nia halerik, ami la hare ba sasan maibé ami hare ba Domin ne’ebé iha, ”  espressa Xefe Suku Aubeon, Domingos Gonzaga.

Tuir observasaun direta husi G-RTV.com iha terrenu, prezensa apoiu umanitáriu ne’e, komunidade afeta sira simu ho haksolok no hato’o mensájem katak Avô Nana tenke nafatin apoiu povu kbi’it la’ék

Entretantu, inundasaun iha Aebon no Sikone, akontese iha loron 29/06 bainhira durante semana rua udan iha Natarbora no identifika família balun lakon Sasan, estraga uma balun inklui animál.

Tuir Dadus husi Suku rua ne’e ( Aubeon no Sikone) família hamutuk 399 iha aldeia 4 ne’ebé sai vítima ba inundasaun.

Assaun ne’ebé hanesan ekipa Xanana iha loron ida antes hakat ba Natarbora, hala’o uluk iha munisípiu Covalima, iha postu Administrativu Suai-Villa no Tiliomar maibé mos Xanana nia asaun kariedade ne’e la’o ona iha tempu Covid-19 iha ne’eb’e sempre fó apoiu umanitariu ba komunidade sira iha territóriu nasionál.

(REMATA)