G-RTV News: Conselho Dos Combatentes Da Libertação Naçional (CCLN) hahu halo lipeza jerál ba edifísiu CCLN foun, ne’ebé durante tinan 18 grupu Arte Moris utilija ba atividade arte inklui komunidade balun.
‘’Ohin ami hahu limpeza ba fatin ida ne’e, no hahu hadia uma sira ne’e, atu CCLN tempu badak mai servisu ona, tambá fatin ne’ebe ami hela ba agora, Ne’e provizóriu de’it, fatin arte-moris ne’e, legaliza ona husi Ministériu Justisa (MJ) iha tinan kotuk’’ esplika Prezidente CCLN Vidál de Jesus ‘’Riak Leman’’ iha arte moris, Sexta ne’e. (18/06).
Konabá komunidade no grupu juventude arte-moris, veteranu ne’e, klarifika katak iha ona akordu ho komunidade sira ne’ebé hela iha area arte-moris ne’e.
‘’Ami halo ona akordu ho komunidade uma-kain 14, atu halo indimizasaun dollar rihun rua kada-uma kain, maibé grupu arte-moris, CCLN entrega ba Sekretáriu Estadu Arte no Kultura (SEAK)’’. Informa Veteranu ne’e.
Data ba rezidente sira ne’ebé sei iha area Arte Moris nian, Riak Leman fo ultimatu iha de’it loron 30 singnifika to’o dia 30 fulan oin bele hamamuk ona fatin.
‘’Bazeia ba akordu, hahu ohin to’o loron 30 nia laran obrigatóriu hamamuk ona fatin’’, haktenik Nia.
Iha fatin hanesan, diretór Arte Moris, Iliwatu Dana Bere, espressa ho hakfodak tambá CCLN sira mai derrepente hodi halo limpeza.
‘’Ami hakfodak tambá la iha notifikasaun eh informasaun ruma, derrepente Aman veteranu sira mai, maske antes ne’e ami iha ona diálogu ba malu’’. Espressa fundadór ne’e.
Nia fortifika tan, koalia ona ho parte Ministériu Justisa (MJ) no CCLN ohin, atu buka solusaun.
‘’Ohin ami koalia ho parte MJ no CCLN, nune’e parte guvernu sei buka solusaun ba arte-moris, maibé aman veteranu sira husi CCLN foo ami loron 30 de’it atu hamamuk fatin’’. Iliwatu fortifika.
Prossesu ne’e, la’o ona iha tinan kotuk (2020) atu muda sai Arte moris hodi foo fatin ba parte veteranu CCLN hodi okupa ba servisu nian maibé la iha solusaun no prossesu parradu.
‘’Iha tinan kotuk, tenta kontaktu ho parte Sekretáriu Estadu Komunikasaun Sosiál atu fasilita diálogu ho parte SEAK no Terras Propriedade, ikus mai indika fatin armajém iha Bebora, maibé kondisaun la favorável, nune’e ami rezeita no kontinuasaun solusaun la iha to’o ohin CCLN mai limpeza’’. reforsa Iliwatu.
Ho laran nakraik, Iliwatu konfesa ba G-RTV.COM, konabá situasaun ne’ebé oras ne’e dadaun Arte Moris hasoru.
‘’Situasaun ida ne’e, difísil mai ami, tambá distinu atu para iha ne’ebé mak sei nakukun loos, tambá seidauk iha solusaun fixu ba situasaun ida ne’e, maibé segunda semana oin, sei hala’o diálogu entre ami ho parte guvernu’’. Konfesa Iliwatu.
Iliwatu esplika Prossesu muda mai iha fatin ne’e, iha akordu ho sekretáriu Estadu Arte Kultura iha primeiru Guvernu ne’ebé lidera husi Virgílio Smith, ho kontratu fulan 6, maibé ikus mai deside hodi renova kontratu ho estatu sem limitasaun ba utilizasaun maibé presija husu koñesimentu husi guvernu bainhira atu muda bu’at ruma husi fatin ne’e.
Grupu Arte Moris sai familiár iha komunidade arte Timor Leste no estranjéiru ne’ebé hahu iha tinan 2003, no grupu ne’e rasik halibur no prodúz ona jóvem kreativu barak iha arte oi-oin, inklui loke formasaun ba pintura no kreatividade arte-seluk. Atualmente grupu arte moris ka komunidade arte moris, akumula ema 50 resin ba atividade arte nian.
Fatin ne’e rasik, la’ós de’it Arte ba pintura, maibé husi fatin ne’e hamoris moos banda múzika famozu sira hanesan GALAXY, KLAMAR, NARAN LAEK, NOISE inklui grupu teatru famozu sira hanesan BIBI-BULAK, TEATRU TIMOR LESTE (TERTIL), TEATRU FETO TIMOR LESTE (TEFTIL), no hamoris moos Rádiu JOJO FM.
Jornalista : Arménio.
loading="lazy" />