G-NEWS (Dili) – Bazeia ba Dekreto-lei número 21/2021 de 10 Novembru kria subsidiu mensal de transporte, rezolusaun Governu número 130/2021 kona-ba jestaun no re-alokasaun veikulus Estadu no padraun prosedimentu operasional kona-ba realokasaun no utilizasaun veikulus estadu Pool iha Ministériu, instituisaun Estadu , servisu Fundu Autonoma no Pool Nasional.
Kinta Feira ne’e (27/10/2022) Ekipa Fiskalizasaun Konjunta (EFK) kompostu husi PNTL, KAK, KFP, Mdf-DJJPE no MTK-DNTL, hala’o konferensia imprensa iha Edefisiu Komandu Jéral PNTL Kaikoli Dili, atu aviza ba responsavel Lojistika no patrimonio iha ministériu, instituisaun estadu, servisu Fundu Autónoma, Autoridade no Administrasaun Munisipal hotu atu halo kontrolu másimu ba utilizasaun viaturas estadu iha loron finadu, hahú iha loron 31 de Outobru to’o 3 de Novembru 2022, maibé autoriza de’it ba sira ne’ebé halo atividade fins profisionais ho karta autorizasaun husi superior.
Ekipa Fiskalizasaun Konjunta ba Viaturas Estadu husu ba responsável lojistika no património sira atu fó hatene ba utilizador sira hodi kumpri avizu ne’e, karik utilizador balun la kumpri informa imediatamente ba ekipa EFK atu halo intervensaun lalais.
Diretór Jéral Jestaun Patrimóniu Estadu Januario da Gama informa ba utilizador kareta estadu sira katak, ekipa fiskalizasaun sei halo monitorizasaun ba utilizasaun kareta estadu durante loron bo’ot Finadu ne’ebé sei hamutuk ho Polísia Trânzito, sei halo pasa revista.
“ohin iha oportunidade dadersan ida ne’e ekipa konjunta ba Fiskalizasaun Viaturas Estadu (EFK) estabelese tuir rejulasaun Governu no sirkular husi Ministériu Finansas ninian hanesan kontinuasaun husi despasu ba ekipa fiskalizasaun konjunto atu halo konferensia imprensa hodi informa kona-ba nesesidade ekipa fiskalizasaun konjuntu atu halo kontrolu ba movimentu veukulu estadu ninian (kareta no motor) iha ambitu selebrasaun loron boot Finadu ninian ne’ebe tuir rezulasaun Governu número 130/2021, reforsa husi dekretu lei número 21/2021 fó kompetensia ba ekipa fiskalizasaun hodi kontinua regularmente halo kontrolu ba movimentu veikulu estadu nian ba fim de semana inklui loron boot finadu nian”dehan nia.
Pontu vocal KFP Euclides Vidal Madeira hateten , sei koordena ho Polísia Trânzitu Nasionál no Munisipal hodi halo pasa revista ba movimentu viaturas Estadu iha nivél Munisípiu, Postu Administrativu sira, hodi identifika utilizador viaturas estadu nian ne’ebé la kumpri regras ne’ebé mak fo sai ona.
Sira mós husu ba públiku atu halo kontrolu ba viatura estadu nian ba loron finadu, autoriza atu bele hasai fotografia no video hodi lansa iha mídia sosiál ka bele kontaktu direita ba númeru telemóvel ne’ebé mensionadu (77304448, 77991550 no 77230182)
Pontu vogal PNTL Inspetór Xefe Inocêncio da Costa Freitas haforsa, funsionáriu públiku ne’ebé lori kareta estadu mak hetan infrasaun sei selu multa no kareta sei prende.
Entertanto veikulu estadu ne’ebé autoriza halo movimentu ba viaturas instituisaun durante feriadu mak PNTL, F-FDTL, Servisu Saúde, Bombeiros, Servisu Karantina, Alfandega, Ambulacia no hirak ne’ebe iha autorizasaun hodi hala’o servisu professional ka fó assistensia ba dezastre naturais.
Jornalista : Alves Pinto
Editór : Amito Qonusere Araújo
loading="lazy" />