G-NEWS (KAIRAVELA-VEMASE) – Sekretáriu-Jerál Partidu FRETILIN no Prezidente TROIKA Mari Alkatiri ho konfiansa deklaran, eleisaun parlamentar ne’ebé sei akontese iha loron 21 maiu 2023 hatudu povu mak manán, nune’e bele hadi’a, hari’i, haburas no habelar naksalak sira ne’ebé mak akontese durante ne’e.
Iha kampaña da-huluk ne’ebé hala’o iha Kairavela Postu Vemasse, Munisípiu Baucau, hetan partisipasaun máximu husi militantes no simpatizante sira.
Iha kómisiu polítika, Sekretariu Jerál informa, Partidu FRETILIN asina ona plataforma ho partidu PLP no KHUNTO, maske lao ketak, sei hamutuk fila-fali depois eleisaun, atu ukun hamutuk, atu lori progresu.
“FRETILIN manán, Timoroan tomak sei manán, tanba ne’e eleisaun iha 21 maiu 2023 povu mak atu manán tanba ne’e povu tenke vota ba FRETILIN. Laiha diskriminasaun hanesan timoroan, ita hotu timoroan, Laiha eskluizaun, laiha konflitu. Tanba ne’e ha’u nia apelu hosi ne’e ba oin katak, ita-nia ukun tenke fó benefisiu ba povu tomak,” Sekretáriu-Jerál Mari Alkatiri hateten.
Perante militantes no simpatizante sira nia oin, Marí Bin Amude Alkatíri afirma tán, ba oin tenke barani atu hadi’a no hatur loloos estadu direitu demokrátiku tanba iha interferênsia hosi poder informal ba primeiru Órgaun Timor-Leste.
“Tanba ne’e obrigasaun FRETILIN nian bainhira manán eleisaun hamutuk ho parseiru sira haboot aliansa ida ne’e atu bele hadi’a estadu hanesan instituisaun ho Sistema semi-prezidensial ne’ebé mak ita define kedas konstituisaun mak iha leten, hadi’a estadu hanesan vida istitusional no kultura istitusional ita tenke hadi’a.”
Maske loron manas, maibé militante sira la hakiduk ba kotuk, firme hodi rona nafatin lideransa Fretilin nia komprimisu polítika. Sekretariu Jeral Mari Alkatiri kontinua kompromete katak, hadi’a prosesu governasaun nune’e labele iha governu diskriminatóriu.
“Ita haree ita-nia sistema edukasaun laiha kualidade, tanba ne’e ita tenke hadi’a kualidade, hahú halo teste ba mestre sira ne’e hotu no fó formasaun diak ba sira, semak la hatene labele hanorin,” Sekretariu-Jerál hateten.
Bainhira hetan fiar hosi Povu, Partidu FRETILIN sei hadi’a Sistema saúde no kria kondisaun ba professional médiku sira atu Sistema funsiona ho di’ak.
Sekretariu Jerál kompremete mós katak, sei hadi’a problema veteranu atu hatur loloos direitu ida-idak ba veteranu sira bazeia ba prestasaun iha tempu funu.
Alende ne’e, Fretilin nia Governasaun, sei hadi’a bee-moos no saneamentu ba povu, nutrisaun ba estudante sira, estudante tenke iha hahan kualidade no vitamina, nune’e sira sai matenek.
“Hahú agora ita tenke luku kle’an ba povu nia leet, ha’u fulan-6 ona ba aldeia no suku hodi hatene povu nia halerik, povu nia halerik mak edukasaun, saúde, agrikultura no Estrada. Signifika saida mak ita halo besik tinan-20 laloos ou sala tiha ona, tanba iha tinan-20 ne’e ita gasta fundu minarai maka’as tebes”, Marí Alkatiri kompromete tán.
FRETILIN marka diferensa iha kapasidade atu halo jestaun ba povu nia osan para fó benefisia ba povu.
Iha kampanha aberta ne’e, Lideransa Partidu Troika Fretilin, hato’o ida-idak nia komprimisu polítika perante militante no simpatizante sira nia oin.
Iha kampanha Fretilin iha Vemase, observa hosi autoridade eleitóral hanesan CNE no STAE, observador Nasionál no Internasionál, sosiedade sivil, ne’ebé hetan seguransa másimu hosi autoridade defeza no seguransa.
Jornalista : Ekipa G-News
Editór Testu : Amito Qonusere Araújo
loading="lazy" />