Jornalísta : Arménio //
G-RTV.com (Dili) : Ohin, Partidu Libertação Popular (PLP) hala’o konferénsia nasionál hodi hakbi’it liu husi konsolida malu atu hametin partidu ba oin.
Iha abertura , Alkatiri nu’udár konvidadu espesiál husi Partidu FRETILIN afirma, dalan atu ukun nafatin nakloke to’o 2023.
‘’Ha’u hanoin dalan atu ukun to’o 2023, sei nakloke bainhira ita manan iha segunda volta, tambá ne’e hau mai lori FRETILIN nia naran, tempu to’o ona atu hatudu ba na’ók ten sira katak ba sira tempu la iha ona’’, Afirma Sekretáriu Jerál partidu FRETILIN, Mari Alkatiri iha nia diskuru abertura, salaun Canossa-Has Laran, 27/03/2022.
Eis-preimieru ministru ne’e, rekoñese katak eleisaun ne’e iha ema seluk ne’ebé konsidera sai nia adversáriu polítika, kontrola sistema servisu polling staff husi guvernu ne’ebé inklui mós FRETILIN.
‘’Ita ukun hela maibé husik ema seluk mak kontrola fali ita nia poling staff no fiskais sira, ne’e peskiza ne’ebé mak ha’u halo, ne’e mak halo sira nia votu ne’e sa’e’’, deklara Alkatiri.
‘’Tambá ne’e ita lalika tauk, importante mak ita nafatin hamutuk iha segundu volta, Ramos Horta nian ne’e votu falsu hotu, votu inventadu no votu na’ók ten, nune’e mak atu evita tenke prepara antes’’, espressaun optimista husi Alkatiri.
Hatan konabá relasaun entre Lere Anan Timur ne’ebé oras ne’e públiku preokupa, fundadór FRETILIN ne’e esplika katak sira hasoru malu ona no sei simu Lere iha CCF ho dignu.
‘’Ami Hasoru malu ona, LAT sei fila ba nia uma (FRETILIN), ita sei simu nia ho dignidade, nia sei partisipa iha enkontru sira iha CCF’’, Dehan Alkatiri.
KHUNTO Nia pozisaun ba Segunda volta ELPR 2022
Iha fatin hanesan, partidu KHUNTO ne’ebé lidera husi Berta dos Santos, pozisiona ni-án katak sei hamutuk ho partidu PLP no FRETILIN atu apoia kandidatu Lú Olo iha segunda volta eleisaun prezidensiál 2022 (ELPR).
‘’Iha segunda ronde ita tenke manan, parabéns ba partidu tolu, sai unidade hodi forte nafatin, fiar katak ita sei manan’’, Deklara Naimori Bucar nu’udár konselleiru máximu partidu KHUNTO iha diskursu abertura.
‘’Sira labele hamnasa lai atu manan iha segunda volta ne’e, ita tenke servisu makaas iha loron 19/03 katak hatudu ba ita nia maun Lú Olo ita forte ho prezensa FRETILIN, KHUNTO, PLP inklui Os Verdes’’, Dehan Naimori.
Entretantu, iha entrevista ho média, prezidente partidu PLP, Taur Matan Ruak espressa, sei asegura koligasaun ne’e hodi hasoru eleisaun prezidensiál inklui eleisaun prezidensiál to’o 2023.
‘’Ami nia koligisaun aseguradu to’o 2023 la’o hamutuk iha eleisaun parlamentár no agora, ami hakarak mós servisu hamutuk atu lori ami nia kandidatu Lú Olo bá prezidente repúblika dala ida tan’’, Espressa Atuál xefe guvernu ne’e.
Taur Matan Ruak mós parabeniza estrutura no militante partidu PLP ne’ebé durante ne’e firme nafatin maske nia rasik auzénsia maibé PLP kontinua ezisté to’o ohin loron.
Konferénsia ne’e, hetan partisipasaun másima husi estrutura no organizasaun massa partidu PLP hahu husi nasionál to’o postu administrativu iha territóriu nasionál. (REMATA).
loading="lazy" />