G-NEWS (DILI) – Deskonfia Lezadu mak lori aitahan at arguidu sira ho naran inisiál DM, SM, JSdC, DB ho DdI obriga lezadu kolu ropa iha ema barak nia oin.
Akuzasaun ne’ebé Ministériu Públiku aprezenta ba tribunál le sai iha indisíu sufisiente katak, loron 16 fulan Fevereira tinan 2021, por volta 22:00 kalan, Lezadu Manuel da Costa Mausaco ho familia sira tur hela iha uma. Arguido sira hakbesik ba iha nia uma hodi fatuk tuda rahun sasan mak hanesan janela ha’at, sova tolu, bikan lima, kanuru, kadeira lima, kalen no odamatan. Altura ne’ebá, arguidu sira mós nauk lezadu nia bibi ida ne’ebé kesi iha uma sorin.
lha loron 20 fulan Fevereiru tinan 2021, lezadu Manuel da Costa Mausaco, ho lezadu Pedro Bere da Costa, kondus motor atu ba tuir seremónia sau batar iha Erhetu, maibé to’o iha Fatubosa arguidu sira hapara. Arguidu sira haruka lezadu sira tun husi motor, maibé lezadu Pedro halai ho motor hodi kontaktu nia bin Sarita da Silva Garcia, atu informa ba iha Polisia hodi mai iha fatin akontesenmentu. Arguidu sira kaer lezadu Manuel hodi la’o distansia metru atus ida, ba iha uma lisan hodi halo interoátoriu.
Lezadu Pedro Bere da Costa fila fali ba iha fatin akontesementu hodi haree lezadu Manuel, tanba ne’e arguidu sira kaer nia hodi arguidu DM tuku kona iha oin, kotuk laran no lori sira ba halo interogatóriu.
Bainhira to’o iha uma lisan, arguidu sira lori ai baku, tuku to’o lezadu monu ba rai no haruka nia hasai ropa hodi haree aimoruk a’at iha nia isin tanba deskonfia lezadu mak kaer hodi hamate sira nia aman.
Arguidu DM lori liman tuku dala rua iha lezadu Manuel nia hasan parte los no tebe dala rua iha kanosen, tamlnba hatan laloos kona-ba sasan ne’ebé sira lori ba sau batar.
Arguidu SM lori liman tuku kona lezadu Manuel nia ulun, tanba ne’e lezadu Pedro hamrik atu ba sori, maibé arguidu sira kaer nia hodi haruka tur hodi haree nia aman ne’ebé arguidu sira hasai nia ropa halo isin molik.
Lezadu Pedro Bere da Costa haree arguidu sira baku nia aman, tamba ne’e nia hamrik atu ba ajuda, maibé arguidu DM tuku kona iha nia oin no kotuk laran.
Lezadu Manuel desmaia no konsiente fali hodi sira obriga hemu be’e kaneka bo’ot ida to’o hotu.
Arguidu Sira kaer lezadu na’in rua komesa husi tuku 8:00 to’o iha tuku 10:00 bainhira Polisia to’o iha fatin akontesementu hodi detein sira.
Konsekuênsia husi arguidu sira nia asaun ne’e halo lezadu sira sente moras no moe tanba hasai ropa iha ema barak nia oin.
Arguidu sira interoga, baku, hasai ropa halo molik, katak ne’e lei bandu, maibé arguidu sira hatene katak, bainhira kaer ema lori halo nafatin.
Arguidu sira halo krime hasoru lezadu sira, tamba deskonfia lezadu Manuel da Costa Mausaco mak lori ai kulit hamate sira nia aman.
Arguidu sira halo krime ho livre, deliberada, konsentemente no hatene katak hahalok ne’e lei bandu no kastigu tuir lei.
Arguidu sira hanesan autor material ba konkursu krime dano simples previstu no púnidu tuir artigu 258 numeru 1, furtu agravadu previstu no púnidu tuir artigu 252 númeru 1, alina b, nomos krime sekuestru previstu no púnidu no punidu tuir artigu 160 númeru 2, alina b no d hotu-hotu husi kódigu penál.
Iha sala julgamentu laran, arguidu hili direitu ko’alia, faktu sira ne’ebé konta iha akuzasaun ne’e balun loos balun sala.
Nia dehan, mak mak iha data akontesimentu primeiru iha loron 26 fulan Fevereiru no tuir iha loron 20 fulan Fevereiru.
Arguidu DM katak, iha altura ne’ebá sira dekonfia lezadu tanba sira aman mate, bainhira atu lori mate isin lezadu nia fen, lori aitahan ida ba hatama iha kaisaun laran.
“Ami deskonfia nia tanba nia mak haruka nia fen ba tau aitahan ba ami nia aman nia kaisaun, depois ami bolu sira atu rezolve sira la mai, liu
tiha ne’e lori tan manu, asu ba knua depis ami husu nia hatan lolos ne’e mak ha’u tuku dala rua iha hasan parte lós no haruka hasai ropa”, konfesa arguidu DM ba Tribunál.
Arguidu mós nega katak, depois hakoi tiha sira nia ama nia mate, fila huis rate mai iha de’it uma, la sai ba fatin ruma, no mós la ba lezadu nia uma, la estraga lezadu nia sasan inklui bibi ne’ebé lakon, no laiha koñesimentu.
“Ami ba hakohi tiha ami nia aman, fila ami iha de’it uma ko’alia fetosan umane, ami la estraga lezadu nia sasan no la naok nia bibi, derepente de’it polisiá mai kaer ami, polisiá mak dehan ba ami katak ami mak estraga sasan mak ami hatene,”konfesa nia.
Rona tiha husi parte rua, Tribunál koletivu ne’e deside adia hikas ba loron loron 26 fulan Abríl 2023.
Audénsia julgamentu ne’e prezide husi Juiz Koletivu Albertina Neves, Afonso Carmona, Maria Solana Ministériu Públiku reprezenta husi Prokuradór Reinato Bere Nahac arguidu sira hetan asisténsia legál husi Advogadu Privadu Ismael Assunção.
Jornalista : Ekipa G-News
Editór Testu : Amito Qonusere Araújo
loading="lazy" />