G-NEWS (DILI) – Iha Kuarta-Feira (26042023) dáder, tuku 08:00, funsionáriu Ospitál Nasionál Guido Valadares (HNGV) istoria malu ho ho família vizitante ida, iha área Óspitál Nasionál.
Haksesuk malu ne’e akontese tanba vizitante ne’e para kareta iha fatin estasionamentu transporte funsionáriu HNGV nian. Tanba haksesuk malu mak Jornalista hosi Ajênsia Tatoli.IP Zezito da Silva kuriozu atu hatene motivu hosi akontesimentu ne’e.
“Iha informasaun ida katak, ema istória malu iha Ospitál Nasionál Guidu Valadares. Ha’u (Zezito da Silva, jornalista Tatoli) ha’u kuriozu tebes atu buka hatene saida mak akontese iha ne’ebá. Hafoin ha’u to’o iha ospitál, ha’u haree katak ema barak hobur hela pesoál funsionária feto ida no maun ida mak haksesuk malu hela iha parajen karreta nian”, Zezito esplika.
“Hafoin ha’u hakat ba, ha’u konfirma kedan ba pesoál funsionária ne’e, maibé nia haree ha’u tara hela karta jornalista, nia hateten mai ha’u dehan, laiha buat ida, entaun ha’u la’o liu tiha. Depois menutu hira, haksesuk malu ne’e makas liután, entaun ha’u fila fali mai akompaña ho objetivu atu hatene motivu hosi problema ne’e. Maibé ha’u to’o iha fatin haksesuk, pesoál funsionária ne’e tama ba Diresaun Departamento de Gestão e Informação nian. Entaun ha’u konfirma fali maun ida sira haksesuk malu ne’e. Depois maun ne’e esplika kronolojia”, Zezito informa ba G-News.
Alende ne’e, Jornalista Tatoli.IP ne’e mós konta ninia komunikasaun ho vizitante ida iha Ospitál Nasionál Dili antes hetan impedimentu hosi ajente HNGV.
“Maun bele konta oituan loloos saida mak akontese entre maun ho pesoál funsionária??Maun : Ha’u nia oan moras, kalan rua ha’u hein nia iha ospitál no ha’u para hela ha’u nia karreta iha parajen ne’ebá tanba ne’e mak nia mai hakilar ha’u, dehan para fatin ne’e ba funsionáriu ospitál nian de’it, seluk labele para iha ne’e. Jornalista : Pesóal ne’e koalia ho ita hanesan ne’ebé mak to’o istória malu hanesan ne’e?
Maun: Ha’u foin mai iha ospitál, ha’u lahatene parajen ida ne’ebé mak públiku nian no funsionáriu HNGV nian, tanba ha’u para kalan rua seguransa la hasee ha’u ne’ebé ha’u mós la hatene. Loloos hanesan ne’e nia mai fó hatene ha’u didiak, maibé nia mai hakilar fali ha’u hanesan labarik kiik, depois telefone tan polísia mai foti ha’u nia dokumentu, ida ne’e mós ha’u kumpre hotu ona, maibé mana nia étika komunikasaun mak laiha, maineira halo aprosimasaun mai ha’u mak hanesan ema bandalizmu”.
Bainhira Jornalista Ajensia Tatoli.IP Konversa ho vizitante ne’e seidauk hotu, pesoál funsionária HNGV bolu Jornalista ne’e ho hakilar
“Pesoál Funsionária : Ita boot jornalista labele kobre asuntu ida ne’e hodi publika, ha’u mós eis-jornalista ida. Jornalista : Tanba saida mak ha’u labele halo kobertura iha fatin Instituisaun Estadu nian? Pesoál Funsionária : Labele, labele, horsida ha’u haree iha facebook mak iha ona?????, ne’e lalika publika. Ospitál iha regra rasik. Jornalista : Ha’u mós lei garante ha’u nia Liberdade Imprensa, satán fatin ne’e fatin públiku, tanba saida mak ita bandu ha’u labele kobre iha ne’e? Pesoál Funsionária: Ita boot labele hasai foto, video hodi publika? Jornalista : Ha’u to’o agora la hasai foto no video ruma hosi ita boot sira nia haksesuk malu, maibé se karik ha’u halo video no hasai foto hodi publika iha media, ne’e nia problema iha ne’ebé”, Jornalista ne’e hasara tuir.
Relasiona ho ne’e, Timor-Leste Press Union (TLPU) lamenta ho tentativa impedimentu hosi pesoál funsionária HNGV ba kobertura jornalista iha ospitál. HNGV hanesan instituisaun públika ida, ema ida ka pesoál ida laiha direitu atu hakilar jornalista hodi impede fali atividade jornalístika.
Tanba ne’e, TLPU husu ba pesoál funsionária HNGV ne’e atu uza komunikasaun ne’ebé saudável no uza maneira aprosimasaun ne’ebé di’ak, jornalista la’os ema kriminozu ida atu ema hakilar sem respeitu.
TLPU husu ba dirijente ospitál atu eduka pesoál funsionária ne’e atu labele repete tan aktu bandalizmu iha ospitál hodi hasoru ema se de’it.
Entertantu, tuir Konsrituisaun RDTL artigu 41 kona-ba Liberdade imprensa no komunikasaun sosiál ninian.
1. Iha garantia ba liberdade imprensa nian no ba meius seluk tan kona-ba komunikasaun sosiál.
2. Halo parte liberdade imprensa nian, liberdade ko’alia nian no hamoris/hakiak jornalista sira, asesu ba fontes kona-ba informasaun, liberdade editoriál, protesaun ba independénsia no ba segredu profisionál no mós direitu atu halo jornál, publikasaun ninian no meius difuzaun selu-seluk tan.
5. Estadu hametin ezisténsia ba servisu públiku ida ba rádiu no televizaun, ne’ebé sente livre, haree mós ba objetivu seluk, hanesan protesaun no divulgasaun kona-ba kultura no tradisaun Repúblika Demokrátika Timór-Leste nian, no fó garantia ba ema ida-idak atu hateten nia hanoin rasik.
To’o informasaun ne’e fó sai, G-News seidauk hetan konfirmasaun hosi Autoridade Ospitál Nasionál Guidu Valadares, no G-News sei fó sai iha loron tuir mai.
Jornalista : Ekipa G-News
Editór Testu : Amito Qonusere Araújo
loading="lazy" />