Jornalísta : Arménio //
G-RTV.com (Dili) : Hafoin STAE fó sai rezultadu apuramentu nasionál iha loron 21/03 ne’e, rezulta, Kandidatu Prezidente Repúblika (KAPREZ) períodu 2022-2027, provizoramente, José Ramos hetan votu-ás liu, ho totál apuramentu 301481 (% 46,58) votu no kandidatu KAPREZ, Francisco Guterres Lú-Olo iha pozisaun da-ruak ho totál apuramentu 143408 (%22,16) votu.
Ho Rezultadu ida ne’e, seidauk iha kandidatu ida ne’ebé manan maioria ho pursentu 50+1, nune’e sei fó dalan ba ronde-daruak tuir lei konstituisaun RDTL artigu 76, ne’ebé sei kompete husi vensedór primeiru no segundu karik la iha rezignasaun entre vensedór na’in rua ne’e.
Nune’e, kandidatu vensedór primeiru, José Ramos-Horta ne’ebé indijita husi partidu CNRT, hala’o konferénsia imprensa (KI) hodi pozisiona nia-án katak prontu atu simu apoiu.
‘’Ha’u kontente tebes ho rezultadu eleisaun ne’e, demokrasia mak nune’e, tambá ne’e ha’u husu mai ita vota dala-ida tan no bemvindu bá se de’it atu tama iha movemntu bo’ot ida ne’e hodi apoia kandidatura ha’u nian’’, Dehan Horta iha KI, ne’ebé hetan akompañamentu husi Kay Rala Xanana Gusmaõ no ekipa sussesu iha sede nasionál kandidatura, Osindo (Dili), 22/03/2022.
Premiadu nóbel bá paz hatutan tan, agradese ba povu tomak, votante hotu, seguransa nasionál, inklui ekipa sussesu, partidu apoiante, movimentu no organizasaun oi-oin ne’ebé apoia nia kandidatura no partisipa iha festa demokrasia la’o ho páz.
Entretantu, Iha loron ne’ebé hanesan, reprezentante ekipa sussesu husi kandidatu prezidente ho númeru sorteiu 8, Tenente Jenerál reformadu, Lere Anan Timur (LAT), deklara, ‘’sei falun’’ desijaun atu apoia kandidatu entre kandidatu na’in rua ne’ebé hetan votu-ás liu iha primeira ronde.
‘’Seidauk iha komunikasaun offisiál ruma, maske nune’e iha ona komunikasaun informal, kestaun étika, ha’u labele koalia, sei fó tempu ba LAT atu hanoin, tempu badak sei halo konferénsia imprensa hodi fó sai nia desijaun’’, deklara reprezentante ekipa sussesu LAT, Flávio Simões iha sede nasionál kandidatura, Pantai Kelapa (Dili).
Tuir observasaun, iha parte loraik, ekipa sussesu husi kandidatu vensedór da-lima husi Partidu Demokrátiku (PD) hala’o ona aproximasaun ho kandidatu Horta iha nia gabinete, faról (Dili), ne’ebé lidera direta husi sekretáriu jerál PD nu’udár mós porta-vóz prinsipál kandidatu PD, Mariano Assanami Sabino.
Maske halo ona aproximasaun maibé seidauk iha konkordánsia fixu tambá tuir informasaun ne’ebé G-RTV.com assesu, internalmente PD sei deside iha loron balun tuir mai.
Tuir rezultadu apuramentu nasionál husi STAE entre LAT no Assanami nia votu, LAT okupa pozisaun da-4 ho totál votu hamutuk 48959 (%7,57) tuir kedas ho konkorrente númeru sorteiu 14, Mariano Assanami Sabino husi PD ho votu hamutuk 47008 (%7,26). (REMATA).
loading="lazy" />