G-RTV.com (Dili) : Líder Nasionál na’in rua, atuál Primeiru Ministru Taur Matan Ruak no Eis-Primeiru Ministru Kay Rala Xanana Gusmão lansa rô rua iha loron Segunda Feira (20/12/2021) iha Dili.
Atividade Taur Matan Ruak hamutuk ho membru Guvernu no konvidadu sira seluk hala’o lansamentu bá rô Berlin-Ramelau iha portu foun Dili, entretantu Xanana Gusmão lansa iha portu tuan ne’ebé lokaliza iha Ministeriu Ensinu Superior nia oin.
Rô Berlin Ramelau ne’ebé sosa liu husi akordu entre Guvernu federál Alemaña no Timor Leste konstrui iha Xina no to’o iha tasi Timor iha loron 9 fulan ida ne’e.
‘’Agradese kooperasaun ho Alemaña no Timor Leste disponível atu halo parseria bá manutensaun rô sira’’ dehan Primeiru Ministru Taur Matan Ruak iha diskursu bainhira lansa rô refere.
Eis-Prezidente Taur matan Ruak moos hato’o orgulhu bá Ministru Transporte no Telekomunikasaun ne’ebé kria kondisaun bá Timor-oan atu kaer rasik rô.
’’ Ne’e simboliza orgullu, determinasaun no vontade atu avansa bá oin, muda no adapta bá dezenvolvimentu ita nia rai, nun’e husu bá tripulante sira atu kuidadu rô’’. Hateten Eis-Prezidente ne’e.
Projetu konstrusaun ró Berlin-Ramelau hala’o iha Xina, liu husi akordu entre guvernu Timor Leste assina ho Guvernu federál Alemaña no Kompañia estaleiru navál ‘’DAMEN’’ iha fulan Maiu tinan 2019.
Osan bá kontrusaun, finansia husi Guvernu Timor Leste no Guvernu Alemaña ne’ebé fahe bá rua : Alemaña ajuda ho montante € 7,8 no Timor Leste aprova € 7,1.
Ró refere ho medida largura 16, kaladu 3.3 metru, komprimentu metro 67,3, áltura metru 4,8, velosidade maxima Nós 10 to’o 12.
Berlin-Ramelau, tuir planu, sei hala’o operasaun viázem, Dili, RAEOA, Atauro, Baucau, Lautém, Viqueque no bá crew rô nian maioria husi Timor-oan rasik.
Iha tempu dadér ne’ebé hanesan, Líder Nasionál Kay Rala Xanana Gusmão, lansa moos rô-rápidu (Kapal Cepat-Lian Indonézia) ho naran Start Craft 8 husi kompañia Versadu Unip. LDA, iha portu tuan Dili, ne’ebé sei ajuda transporte marítima OeCusse-Dili-Atauro ho lais tebes.
Rô refere tula passajeiru hamutuk kadeira 260 ho klasse ne’ebé diferente inklui ho sasan no folin billete depende klasse hahu husi dollar 15 to’o dollar 25 ho ‘’ óras 4 bainhira viázem Dili-Oecusse, no bá Atauro ho minutu 45’’ haktuir Sansaun Gomes nu’udár na’in bá kompañia Versuda iha portu Dili.
Líder nasionál Xanana Gusmão hafoin remata lansamentu bá rô refere hala’o kedas viázem bá Oecusse, nune’e Sansaun afirma nu’udár previléziu ida bá kompañia.
Jornalista : Arménio.
Editór : Ekipa G-RTV.com
loading="lazy" />