G-NEWS (DILI) – Ajénsia Teknolojia Informasaun no Komunikasaun (TIC Timor I.P) sai mós nu’udar implementador ba iha ajenda reforma administrasaun públika, ne’ebé alista implementasaun sistema Identifikasaun Úniku modernu ida nu’udar komponente xave ba implementasaun husi E-Governu (output 1.5 husi Programa Reforma Administrasaun Públika (2019 to’o 2023)) hodi konsidera benefisiu boot ne’ebé sistema ne’e sei fornese.
Tanba ne’e, TIC TIMOR liuhusi Diresaun Identidade Úniku hahú halo Sosializasaun Programa ID Úniku ba Instituisaun Governu, Setór Priviadu, Instituisaun Akademiku no Autoridade Lokál Sira. Tuir planu atividade sosializasaun ba fulan Novembru sei realiza ba Postu Administrativu 8 husi Munisípiu Ainaro no Aileu hahú husi 14 novembru to’o 23 novembru 2022.Sosializasaun Programa ID Únika ba Administradór Postu, Xefe Suku, Xefe Aldeia no Funsionáriu destakadu sira sei hala’o iha Salaun Postu Administrativu sira iha Munisípiu Ainaro no Aileu.
Ekipa sosializasaun sei halo aprezentasaun iha Munisípiu Ainaru liliu Postu Administrativu Ainaro Vila (14 Novembru 2022), Hatu-Udo (15 Novembru 2022), Hatu-Builico (16 Novembru 2022), Maubise (17 Novembru 2022), no kontinua ba Munisípiu Aileu, Postu Administrativu Aileu Vila (18 Novembru 2022), Likidoe (21 Novembru 2022), Remexiu (22 Novembru 2022), no remata iha Postu Administrativu Laulara (23 Novembru 2022).
Ajénsia TIC TIMOR I.P mós sai nu’udar Institutu Públiku ho ninia natureza jurídika ne’ebé maka iha autonomia administrativu, orsamentu no patrimóniu rasik tuir Dekretu Lei No. 29/2017. Tutela ba Primeiru-Ministru, ne’ebé lidera husi Diretór Ezekutivu.
Ajénsia TIC TIMOR iha misaun hodi implementa polítika no estratéjia ne’ebé maka aprova ona iha matéria kona-ba Teknolojia, Informasaun no Komunikasaun, hodi jere rede informátika Governu nian no Entidade Públiku sira seluk, inklui halo jestaun ba infraestrutura teknolojia, informasaun no komunikasaun no fó apoiu iha área Teknolojia, Informasaun no Komunikasaun no Sistema Informasaun nian.
TIC TIMOR I.P. liuhusi Diresaun ID Úniku hahú implementa Programa Identidade Úniku (IDU) ne’ebé sei hala’o rejistrasaun ba sidadaun Timor-Leste, nomos rezidente sira hotu ne’ebé hela iha Timor-Leste. Iha prosesu implementasaun ne’e, Diresaun ID Úniku sei hala’o sosializasaun ba Programa Identidade Úniku (IDU) iha territóriu Timor laran.
Tanba, Sistema ID Úniku permite Governu atu hadi’ak atendimentu servisu públiku, hadi’ak jestaun no koordenasaun politika sosiál sira.
Nune’e permite Governu no setór privadu atu identifika di’ak liu ninia sidadaun sira, no ema sira iha ninia rai-fronteira laran hodi responde ba pergunta sira hanesan “Ita mak sé?”, “Ita mak ema ne’e duni ka la’e?”,
ID Úniku hanesan identidade dijitál ida ne’ebé sei uza hodi identifika no auténtika ema. Iha ne’e ID Úniku ka ID Dijitál sei konsiste husi: Númeru ID Úniku (NIU) hó díjitu 10 (kria aleatoriamente), Informasaun biográfiku (naran, data moris, no fatin moris) no Informasaun biométriku (finger-print/liman fuan, imajen Oin/Facial image no iris/matan).
Sosializasaun ne’e sei hetan partisipasaun husi Diretór Ezekutivu TIC Timor I.P, Ekipa ID Úniku, Autoridade Munisipál sira, autoridade Postu Administrativu, xefe suku, Xefe Aldeia, no ajente estadu inklui mós funsionáriu destakadu husi Ministeriu iha Postu Administrativu sira iha Ainaro no Aileu.
Antes ne’e Diresaun IDÚ mós halo ona sosializasaun ba parseiru dezenvolvimentu sira, Ministériu sira, Universitáriu, no entidade relevante sira seluk, nomós sosializasaun ba munisípiu ne’ebé hala’o ona iha Postu Administrativu sira iha Munisípiu Likisá, Postu sira iha Autoridade Munisipál Ermera, no Rejiaun Autonomia Espesiál Oekussi Ambeno (RAEOA), Sosializasaun ba Administradór Munisípiu nomós Prezidente Autoridade sira iha reunian Konsellu Koordenasaun Teritoriál, no sei kontinua ba Munisípiu sira seluk.
Jornalista : Kontributór G-NEWS
Editór textu : Amito Qonusere Araújo
loading="lazy" />