Dili; 31-03-2021 (G-RTV) – Liu husi komunikadu imprensa ne’ebé hala’o iha Farol (Sede Tatoli), Uniaun Europeia no CEPAD entrega pulsa ba jornalista sira hodi fó apoiu internet no hadi ‘a konetividade jornalista liña frente sira nian iha Timor-Leste.
Asesu ba internet importante tebes ba jornalista sira, hodi halo sira nia servisu ho livre no akuradu, no ajuda sira atu identifika informasaun ne ‘ebé la loos no notísia falsu, no asegura sidadaun sira hodi asesu ba informasaun vitál no konfiável hodi proteje sira-nia an rasik husi virus Covid-19.
Iha kontestu Covid-19 no serka sanitariu iha Timor-Leste, meiu komunikasaun sosiál sira iha papél fundamentál atu garante diseminasaun informasaun ne’ebé loos ba públiku. Asesu ba informasaun ho kualidade di’ak, importante tebes durante krize saúde global no jornalista sira sei sai guarda importante hodi kontra informasaun falsu durante pandemia ne ‘e.
Nune’e, Uniaun Europeia no CEPAD (Centro de Estudos para a Paz e Desenvolvimento), halo akordu ho Asosiasaun Jornalista AJTL no Uniaun Imprensa Timor-Leste, fó kartaun pulsa telefóniku ba jornalista hamutuk 450, ho folin USD 20 kada ema, hodi tulun selu internet no komunikasaun.
Doasaun ba kartaun internet ne’e, finansia husi Uniaun Europeia liu husi inisiativa Reforsa Akontabilidade Governu nian ba Covid-19, liu husi Promove Liberdade no Asesu ba Informasaun iha Timor-Leste ne’ebé implementa husi CEPAD.
Iha komunikadu imprensa Diretór Ezekutivu CEPAD João Boavida hateten Inisiativa ne’e foka liliu ba grupu sira ne ‘ebé esperiénsia difikuldade atu hetan asesu ba informasaun. Projetu ne’e fó kbiit ba sidadaun sira atu hetan asesu ba informasaun liu hosi atividade edukasaun, hasa’e koñesimentu kona-ba sira-nia direitu no promove partisipasaun iha debate demokrátiku iha Timor-Leste.
“CEPAD fiar katak informasaun ba públika ne ‘ebé konfiavel no loos ne’ e importante tebes, liu-liu durante tempu krize COVID-19 nian ne ‘e, no CEPAD sente privilejiadu atu apoia mídia hodi garante katak informasaun sira ne’ e asesivel ba públiku”, dehan nia
Embaixadór Uniaun Europeia ba Timor-Leste Andrew Jacobs hateten: Difficuldade ba Sirkunstánsia ekonómika ne’ebé kauza husi COVID-19 signifika katak jornalista sira nia fonte hodi buka-moris hetan ameasa iha tempu ne’ ebé ita presiza tebes
“Ohin hau sente orgullu tebes atu suporta inisiativa ida nee. Jornalista sira presiza iha meius atu halo relatóriu ida ne ‘ebé loloos no tuir tempu, atu nune’ e públiku bele hetan informasaun kona-ba Surtu Covid-19, oinsa atu proteje sira nia an no hirak ne ‘ebé sira hadomi, no oinsá mak halo funu hasoru COVID-19. Sei la iha tempu ne’ ebé importante liu ba media nebe livre, no media independente laos deit atu moris, maibé atu dezenvolve an mós. Jornalizmu Independente importante tebes atu fó asesu públiku ba informasaun ne ‘ebé loloos no kontra informasaun la loos kona-ba pandemia ne’ e.”
Inisiativa ida-ne ‘e harii bazeia ba medida sira seluk ne’ebé hala’o ona hodi tulun meiu komunikasaun sosiál no jornalista sira, ne’ebé hala’o liu husi “Osan Povu Nian, Jere ho Dia ‘k”, no finansia husi Uniaun Europeia no Kooperasaun Portugeza. Medida apoiu nian sira ne’ e inklui sosa espasu publisidade iha jornál sira no fó insentivu atu insentiva publikasaun artigu sira iha área espesializada sira ba jornalista besik 115.
Vise Prezidente AJTL (Asosiasaun Jornalista Timor-Leste) Aniceto Dos Reis agradese ba Uniaun Europeia no CEPAD ba inisiativa ne’e, tanba apoiu ida ne’e bele fasilita jornalista sira atu bele halo komunikasaun ho fontes sira
“iha periodu serka sanitaria ida ne’e ezijensia ba Online makaas liu, dala ruma kontaktu ho fontes sira liu husi zoom, whatshap, Facebook no apoiu ida ne’e bele hafasil jornalista sira atu bele komunika ho fontes sira tanba dala ruma susar atu hasoru malu ho jornalista” dehan nia
Iha fatin hanesan Secretariu Jeral TLPU Oracio Babo, fó mós agradese ba apoiu ne’e atu bele fasilita servsiu jornalista nian iha pandemia covid-19 ida ne’e
“ami agradese tebes ba Uniaun Europeia no CEPAD bele tulun jornalista sira iha mumentu ne’e no ida ne’e ba dala rua nian maske kiik maibe nia valor boot tebes mai ami”
Fó kartaun pulsa telefóniku ba kada jornalista sira sei transfere husi operador Timor-Telecom, Telemor no Telekomcel bazeia ba naran ne’ebé oras ne’e iha ona lista Uniaun Europeia.
Jornalista : Alves Pinto/ Domingos
Editór : Alves Pinto
loading="lazy" />