Valentine Day, Lori Key Xavier Hakma’an Bisoi Nia Terus, Horta Sai sasin

Jornalista : Arménio //

G-RTV.com (Dili) : Selebra loron Domin eh Namoradu ne’ebé koñesidu ho lian Inglesh, Valentine Day, Eis-Prezidente Repúblika, José Ramos-Horta hamutuk ho Emprezáriu Timor-oan, Key Xavier no autoridade oferese prezente uma ida ba Inan Feton Kbi’it La’ek, Joana Camoes “Bisoi”.

‘’Inan Feton Kbiit Laek, Joana Camoes “Bisoi” durante tinan barak moris nu’udar ema ho difiensia liman no ain ne’ebé la iha família no tinan barak hala’o de’it atividade fa’an kulusaun n sumasu ne’ebé nia rasik produs hosi ailele hodi fa’an ba komunidade sira’’ Haktuir Komunikadu Imprensa ne’ebé G-RTV.com assesu.

Komunikadu ne’e reforsa tan, Uma ne’e halo ho medida 5×6 ho kuarta rua, sala vizita ida, salah han fatin ida  kompleta ho fasilidade, toba fatin, armariu, kadeira no meza inklui dapur, enrega ho serimónia bensaun hosi Padre Vigariu Parokia Nossasenhora Asunção Same, Fernando da Silva.

Iha fatin hanesan, Premiadu Nobel da Paz, José Ramos Horta ne’ebé sai sasin ba serimónia importante ne’e, hato’o parabéns ba Key Xavier hodi lolo liman ba povu kbiit laek sira.

 “Ha’u agradese ba Key Xavier ho nia familia sira hodi halo asaun ne’e, nu’udar modelu ida ita tenki halo tuir, tanba asaun importante tebes, tanba iha tinan 2020 Key ho Maun Boot Xanana no Timoroan barak ajuda ona ema barak iha Timor laran tomak,” dehan Horta iha komunikadu ne’e.

Horta haktuir, durante fulan Maiu 2020, líder nasionál Xanana Gusmão ho emprezáriu Timor-oan no empezáriu Xineza sira fahe mós foos kuaze rihun-10 liu ho ekipamentu desportu ba Timor-oan sira iha munisipiu hotu-hotu.

Kbiit Laek, Joana Camoes “Bisoi” ho matawen hato’o agradese tebes, tanba uma ne’e sai ona mahon no naromak ba nian hela ho dignu.

“Ha’u agradese ba Maun Key hodi tulun ona ha’u halo uma ne’e, ha’u foin sente hetan naroman ida, hodi halo ha’u kontente ho tanis hodi simu uma ida ne’e,” Tenik ho matawen iha Aldeia, Sisurai-Same, segunda (14/02/22).

Nu’udar umanu, Joana Camoes selu Key nia ajuda labele, maibé sei hasa’e orasaun ba Na’I Maromak hodi fó bensaun no kbiit liután ba Key Xavier hodi hatutan nia domin ba hirak ne’ebé presiza tebes.

Entretantu, Diretór Kompañia Badfor Lda, Key Xavier konsidera asaun karidade halo uma ba kbiit laek sira nu’udar kontinuasaun hosi programa “LOLO LIMAN BA KBIIT LAEK NE’EBÉ PRESIZA” sira ne’ebé hala’o antes ona hamutuk ho Lider Istóriku, Kay Rala Xanana Gusmão iha tinan 2020 sei kontinua too agora.

Key halo uma ne’e, hafoin hetan informasaun hosi jornalista sira ne’ebé publika lalaók moris inan feton ne’e iha media.

 “Ha’u haree jornalista sira aprezenta inan ne’e nia problema, tanba ne’e ha’u mai haree direita ajuda tuir ha’u nia kbi’it,” . G-RTV.com sita liafuan Key nian iha komunikadu ne’e.

Key konsidera papél jornalista importante mós, tanba la’ós hala’o de’it atividade koberutra ba situasaun politika, maibé halo mós kobertura ba asuntu sosiál ne’ebé ne’ebé liga problema sosiál povu nian.

“Ha’u nia fuan triste tebes, bainhira ha’u mai haree Tia Bisoi nia uma, nia moris susar tebes, iha tempu ne’ebé, ha’u hanoin tebes hodi buka mai hadia kedas uma ne’e no ohin ita hamutuk mai entrega kedas uma ne’e loron domin ho ne’ebé ema hotu iha mundu tomak no ita Timor-Leste mós selebra ho Avó José Ramos Horta liu hosi entrega uma ne’e,” nia hatete.

Key agradese mós ba autoridade suku, juventude no komunidade ne’ebé apoiu servisu kontrusaun uma ne’e too remata.

Tuir Adjuntu Administradór Munisipiu Manufahi, Filomeno Amaral, apresia ho asaun karitiativa ne’ebé hala’o mós iha loron importante ne’ebé mundu tomak no povu Timor-Leste selebra loron domin nian.

“Uma dignu ida ne’e, nu’udar onra ho solok tebes, tanba ami agradese ba Maun Ramos Horta no Maun Key hodi oferece uma ida ne’e. Key Xavier ema ne’ebé hatudu nia domin no laran luak, ami hatene Key halo ona uma barak iha fatin barak, ne’e tanba domin ne’ebé boot tebes mai hosi nia neon no laran,” lia agradesimentu husi Autoriedade Munisipál ne’e.

Atividade Asaun Sosiál ne’e hala’o iha Munisípiu Manufahe, Postu Administrativu Same Villa, Aldeia Sisurai, Suku Betano iha segunda ne’e.

Hafoin entrega uma ne’e, líder nasionál nu’udár moos kandidatu Prezidente Repúblika José Ramos-Horta hamutuk ho autoriedade sira hala’o diálogo ho komunidade hodi rona preokupasaun sira ne’ebé povu iha baze preokupa. (Remata).